അഞ്ചല്: തമിഴ്നാട്ടില്നിന്നും റേഷനരി കടത്ത് സജീവമാകുന്നു. അരികടത്താന് ശ്രമിച്ച സംഭവത്തില് സിപിഎം നേതാവും സഹായിയും കഴിഞ്ഞ ദിവസമാണ് പിടിയിലായത്. ആര്യങ്കാവ് നെടുമ്പാറ സ്വദേശിയും സിപിഎം മുന് ലോക്കല്കമ്മിറ്റി അംഗവും സിഐടിയു, കര്ഷക സംഘം നേതാവുമായ മനോജ്, ഇയാളുടെ സഹായി സജി എന്നിവരെയാണ് പുളിയറ പോലീസ് കഴിഞ്ഞ ദിവസം രാത്രിയില് അറസ്റ്റ് ചെയ്തത്.
പാവൂസത്രത്തില് നിന്നും പച്ചക്കറി കയറ്റിയ പിക്കപ്പില് പച്ചക്കറിയുടെ മറവില് റേഷനരി കടത്താന് ശ്രമിക്കവേയാണ് ഇരുവരും പിടിയിലായത്. തമിഴ്നാട്ടില് നല്കുന്ന സര്ക്കാര് റേഷനരി കേരളത്തിലേക്ക് കടത്തുന്നുവെന്ന രഹസ്യ വിവരത്തിന്റെ അടിസ്ഥാനത്തിലാണ് അരിക്കടത്തുകാര് പിടിയിലായത്.
കേരള -തമിഴ്നാട് അതിര്ത്തിയില് പുളിയറ ഭാഗത്താണ് പോലീസ് വാഹന പരിശോധന നടത്തുകയും 1600 കിലോ അരിയും ഇത് കടത്താന് ഉപയോഗിച്ച പിക്കപ്പും പ്രതികളെയും പിടികൂടുന്നത്. തമിഴ്നാട്ടില് തുച്ഛമായ വിലക്ക് ലഭിക്കുന്ന റേഷന് അരി വാങ്ങി കേരളത്തില് എത്തിച്ചു പോളിഷ് ചെയ്ത ശേഷം പൊന്നി അരി എന്ന വ്യാജേന വന്തുകയ്ക്ക് വില്പ്പന നടത്തുകയാണ് പിടിയിലായവര് ചെയ്യുന്നതെന്ന് പുളിയറ പോലീസ് പറയുന്നു. അതേസമയം തന്നെ തമിഴ്നാട്ടില് നിന്നും ഇത്തരത്തില് ധാരാളം ലോഡ് റേഷന് അരി കേരളത്തിലേക്ക് എത്തുകയും ഇത് മറ്റു ജില്ലകളില് എത്തിക്കുകയും ചെയ്യുന്നതായി കേരള പോലീസിന്റെ രഹസ്യാന്വേഷണ വിഭാഗവും മുന്പ് റിപ്പോര്ട്ട് ചെയ്തിട്ടുണ്ട്.
രണ്ടാഴ്ച മുമ്പ് കോട്ടവാസലില് കടയ്ക്കുള്ളില് ഒളിപ്പിച്ച നിലയില് വന് അരിശേഖരം പോലീസ് കണ്ടെത്തിയിരുന്നു. ഇതിനു പിന്നിലും ഒരു സിപിഎം പ്രവര്ത്തകന് ആണെന്ന് ആരോപണം ഉയര്ന്നിരുന്നു. എന്നാല് കഴിഞ്ഞ ദിവസം മനോജ് അരികടത്തിയത് സംബന്ധിച്ച വിവരം പോലീസിനെ അറിയിച്ചത് ആര്യാങ്കാവില് ഉള്ള ഒരു സിപിഎം പ്രവര്ത്തകന് ആണെന്ന വിവരവും പുറത്ത് വരുന്നുണ്ട്. വാഹനത്തിന്റെ ഫോട്ടോ സാഹിതം തമിഴനാട് സിഐഡി വിഭാഗത്തിനു അയച്ചു നല്കുകയായിരുന്നു എന്നാണ് വിവരം.
ജന്മഭൂമി ഓണ്ലൈന്