കണ്ണൂര്‍: അമാനുഷികം എന്ന് ഏതെങ്കിലും ഒരു കലാകാരന്റെ കഴിവുകളെ പ്രകീര്‍ത്തിക്കുന്നുവെങ്കില്‍ ആ വിശേഷണത്തിന് സര്‍വ്വഥാ യോഗ്യനായ ഒരു കൊച്ചു കലാകാരനിതാ. ഒരേസമയം രണ്ട് കൈകള്‍ കൊണ്ടും രണ്ട് കാലുകള്‍ കൊണ്ടും വായ കൊണ്ടും അഞ്ച് വ്യത്യസ്ത ചിത്രങ്ങള്‍ വരച്ച് അത്ഭുതം രചിക്കുന്ന കൈതപ്രം ചെറുവിച്ചേരിയിലെ കടവത്ത് പുത്തലത്ത് ജ്യോതിസ് എന്ന ഇരുപത്തിയൊന്നുകാരന്‍.
ചെറുപ്പം മുതലേ ചിത്രരചനയില്‍ തല്‍പ്പരനായിരുന്നെങ്കിലും സാഹസികമായ ഈ ദൗത്യം ആരംഭിക്കുന്നത് ലോക്ഡൗണ്‍ തുടങ്ങിയതിന് ശേഷമാണ്. രണ്ട് കൈകള്‍ കൊണ്ടും രണ്ട് കാലുകള്‍ കൊണ്ടും വായകൊണ്ടും സെലിബ്രിറ്റികളായ സിനിമാ താരങ്ങളെയാണ് പേപ്പറില്‍ സ്‌കെച്ച്‌പെന്നുപയോഗിച്ച് ജ്യോതിസ് വരക്കുന്നത്. അഞ്ച് വ്യത്യസ്ത ആള്‍ക്കാരുടെ ചിത്രങ്ങള്‍ ഒരേ സമയത്ത് വരക്കുന്നതോടൊപ്പം ഒരാളുടെ തന്നെ അഞ്ച് വ്യത്യസ്ത ഭാവങ്ങള്‍ വരക്കാനും ജ്യോതിസ്സിന് സാധിക്കും.
തലകുത്തി നിന്ന് രണ്ട് കൈകള്‍ കൊണ്ടും വരക്കുക, പുഷ്അപ് എടുത്തു കൊണ്ട് വായയില്‍ ബ്രഷ് കടിച്ച് പിടിച്ച് ചിത്രം വരക്കുക, കത്തുന്ന തീക്കൊള്ളി ഉപയോഗിച്ച് ചുമരില്‍ ചിത്രം വരക്കുക തുടങ്ങിയവയും ജ്യോതിസിന്റെ വിനോദങ്ങളാണ്. അച്ഛന്‍ ലോട്ടറി വില്‍പ്പനക്കാരനായ ബാലകൃഷ്ണനും ചിത്രം വരക്കുമെങ്കിലും മകന്റെ ഈ മാന്ത്രിക പ്രകടനങ്ങള്‍ കാണുമ്പോള്‍ അത്ഭുതം. ചിത്രരചനയില്‍ ഏറെ പ്രോത്സാഹനങ്ങള്‍ നല്‍കി അമ്മ വിദ്യയും അമ്മമ്മയും വിദ്യയുടെ സഹോദരീ സഹോദരന്മാരും ജ്യോതിസിന്റെ ഈ കഴിവിനെ ലോകശ്രദ്ധയാകര്‍ഷിക്കുന്ന ഒരു വേദിയിലെത്തിക്കാനുള്ള ശ്രമത്തിലാണ്.
ജ്യോതിസിന്റെ സഹോദരന്‍ പ്ലസ് ടു വിദ്യാര്‍ത്ഥിയായ ശ്രേയസ് ചിത്രരചനയിലും ചെസ് കളിയിലും തല്‍പ്പരനാണ്. തന്റെ കഴിവുകള്‍ ലോക ശ്രദ്ധയിലെത്തിക്കാന്‍ ആ രംഗത്തുള്ളവരുടെ സഹായങ്ങള്‍ തേടുകയാണ് ഈ അപൂര്‍വ്വ കലാകാരന്‍.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: