ആലുവ: നഗരത്തിലെ വ്യാപാരിയുടെ വീട്ടില് നിന്ന് 12 പവന് സ്വര്ണാഭരണങ്ങള് മോഷ്ടിച്ച കേസില് ജോലിക്കാരിയും ആണ്സുഹൃത്തും പോലീസ് പിടിയില്. കട്ടപ്പന കരുണാപുരം ബാലഗ്രാമം ബ്ലോക്ക് 980ല് അനില്കുമാറിന്റെ ഭാര്യ വിദ്യ (32), രാമക്കല്മേട് കൊണ്ടോത്തറ വീട്ടില് ജയ്മോന് (38) എന്നിവരെയാണ് ആലുവ എസ്എച്ച്ഒ എന്. സുരേഷ് കുമാര് അറസ്റ്റ് ചെയ്തത്.
ആലുവ എസ്പി ഓഫീസിന് സമീപം നേതാജി റോഡില് താമസിക്കുന്ന സാമുവലിന്റെ വീട്ടിലാണ് മോഷണം നടന്നത്. എറണാകുളത്തെ ഒരു സ്വകാര്യ ഏജന്സി മുഖേന മൂന്ന് മാസം മുമ്പാണ് വിദ്യ ഇവിടെ വീട്ടുജോലിക്കെത്തിയത്. അലമാരയില് സൂക്ഷിച്ചിരുന്ന സ്വര്ണം കാണാതായ ദിവസം തന്നെ സംശയം തോന്നിയ വീട്ടുടമ ഇവരെ ജോലിയില് നിന്ന് പറഞ്ഞുവിട്ടു. തുടര്ന്ന് ആലുവ പോലീസിനും ഏജന്സിക്കും പരാതി നല്കി. പോലീസ് പലവട്ടം യുവതിയെ ചോദ്യം ചെയ്തെങ്കിലും കുറ്റം സമ്മതിച്ചില്ല. ഇതിനിടെ പോലീസ് രഹസ്യമായി നടത്തിയ അന്വേഷണത്തില് യുവതി പുതിയ സ്വര്ണാഭരണങ്ങള് ഉപയോഗിക്കുന്നതായി കണ്ടെത്തി. തുടര്ന്ന് വീട്ടിലെത്തി വിശദമായി ചോദ്യം ചെയ്തപ്പോഴാണ് മോഷണ വിവരം സമ്മതിച്ചത്.
മോഷ്ടിച്ച സ്വര്ണം ആഭരണ കടയില് നല്കി പുതിയ സ്വര്ണം വാങ്ങുകയായിരുന്നു. കുറച്ച് സ്വര്ണം പണയപ്പെടുത്തുകയും ചെയ്തു. സ്വര്ണം മാറ്റി വാങ്ങുന്നതിനും പണയപ്പെടുത്തുന്നതിനും നേതൃത്വം നല്കിയത് ജയ്മോനാണ്. പ്രതികളെ ആലുവ കോടതി റിമാന്ഡ് ചെയ്തു.
