ന്യൂദല്ഹി: ഒരിടവേളയ്ക്കു ശേഷം എസ്എന്സി ലാവലിന് കേസ് നാളെ വീണ്ടും സുപ്രീംകോടതി പരിഗണിക്കും. ജസ്റ്റിസ് യു.യു ലളിത് അധ്യക്ഷനായ ബെഞ്ചാണ് ഹര്ജികള് പരിഗണിക്കുന്നത്. പലതവണ അവധിക്ക് വെക്കുകയും ബഞ്ച് മാറുകയും ചെയ്ത ശേഷമാണ് നാളെ കേസ് വീണ്ടും പരിഗണനയ്ക്ക് എത്തുന്നത്.
കഴിഞ്ഞ തവണ ഹര്ജികള് പരിഗണനയ്ക്ക് എടുത്തപ്പോള് 2017 മുതല് ജസ്റ്റിസ് രമണയുടെ അധ്യക്ഷതയിലുള്ള ബെഞ്ച് പരിഗണിച്ച ഹര്ജികളാണ് ഇതെന്ന് ജസ്റ്റിസ് ലളിത് ചൂണ്ടിക്കാട്ടുകയും ഹര്ജികള് വീണ്ടും ജസ്റ്റിസ് രമണയുടെ അധ്യക്ഷതയില് ഉള്ള ബെഞ്ച് തന്നെ കേള്ക്കുമെന്ന് അറിയിക്കുകയായിരുന്നു. എന്നാല് ജസ്റ്റിസ് ലളിതിന്റെ ബഞ്ച് തന്നെ കേള്ക്കണമെന്ന് പിന്നീട് ജസ്റ്റിസ് രമണ അഭിപ്രായപ്പെട്ടു. ഇതോടെയാണ് വീണ്ടും ജസ്റ്റിസ് ലളിതിന്റെ ബഞ്ചിലേക്ക് തന്നെ വന്നതും നാളെ പരിഗണിക്കാന് പോകുന്നതും.
മുഖ്യമന്ത്രി പിണറായി വിജയന്, കെ.മോഹന ചന്ദ്രന്, എ.ഫ്രാന്സിസ് എന്നിവരെ കുറ്റവിമുക്തരാക്കിയ ഹൈക്കോടതി വിധി ചോദ്യം ചെയ്ത് സിബിഐയും ഹൈക്കോടതി വിധി വിവേചനപരമെന്ന് ചൂണ്ടിക്കാട്ടി പ്രതിപട്ടികയില് തുടരുന്ന കസ്തൂരിരങ്കഅയ്യര് ഉള്പ്പടെ മൂന്ന് ഉദ്യോഗസ്ഥരും സമര്പ്പിച്ച ഹര്ജികളാണ് സുപ്രീം കോടതിയുടെ പരിഗണനയിലുള്ളത്. തെളിവുകള് വിശദമായി പരിശോധിക്കാതെയാണ് പിണറായി വിജയന് ഉള്പ്പെടെയുള്ളവരെ കുറ്റവിമുക്തരാക്കിയെന്നാണ് സി.ബി.ഐ വാദിക്കുന്നത്.
