മുംബൈ: നടന് സുശാന്ത് സിംഗ് രാജ്പുതിന്റെ മരണത്തിനിടയാക്കിയ ബോളിവുഡ് ലഹരിമരുന്ന് കേസില് നടി ദീപിക പദുക്കോണിനെ ചോദ്യംചെയ്യും. ദീപിക ഉള്പ്പെടെ നാല് താരങ്ങള്ക്ക് നര്ക്കോട്ടിക്സ് കണ്ട്രോള് ബ്യൂറോ ചോദ്യചെയ്യലിന് ഹാജരാകാന് നോട്ടീസ് അയച്ചു. ശ്രദ്ധാ കപൂര്, സാറാ അലിഖാന്, രാകുല് പ്രീത് സിങ് എന്നിവരാണ് നോട്ടീസ് നല്കിയ മറ്റുതാരങ്ങള്. അടുത്ത മൂന്ന് ദിവസത്തിനുള്ളില് ഹാജരാകണമെന്നാണ് ആവശ്യപ്പെട്ടിരിക്കുന്നത്.
നടന് സുശാന്ത് സിംഗ് രാജ്പുതിന്റെ മരണത്തിനു പിന്നാലെ ബോളിവുഡിനെ കേന്ദ്രീകരിച്ചു നടക്കുന്ന ലഹരി മരുന്ന് കണ്ണികളെക്കുറിച്ചുള്ള അന്വേഷണത്തിന്റെ ഭാഗമായാണ് നടപടി.ദീപികയുടെ മാനേജര് കരീഷ്മ പ്രകാശിനെ കഴിഞ്ഞ ദിവസം നാര്ക്കോട്ടിക് കണ്ട്രോള് ബ്യൂറോ ചോദ്യം ചെയ്തിരുന്നു. ടാലന്റ് മാനേജ്മെന്റ് ഏജന്സിയായ ക്വാനിലെ ജീവനക്കാരിയാണ് കരിഷ്മ.
ദീപിക ഇവര് അയച്ച സന്ദേശങ്ങളില് മയക്കുമരുന്ന് ആവശ്യപ്പെട്ടിരുന്നതായി സൂചനയുണ്ട്. കരിഷ്മയും ദീപികയും ഉള്പ്പെടുന്ന വാട്സാപ്പ് ചാറ്റ് കഴിഞ്ഞ ദിവസം പുറത്തുവന്നിരുന്നു. ഇതില് ദീപികയെ ‘ഡി’ എന്നും കരിഷ്മയെ ‘കെ’ എന്നുമാണ് വിശേഷിപ്പിച്ചിരിക്കുന്നത്. ദീപിക കരിഷ്മയോട് ‘മാല്, ഹാഷ്’ എന്നിവ കൈയിലുണ്ടോ എന്നാണ് ചോദിക്കുന്നത്. എന്നാല്, തന്റെ വീട്ടിലാണ് ഇതൊക്കെയുള്ളതെന്നും ഇപ്പോള് താന് ബാന്ദ്രയിലാണെന്നും അത്യാവശ്യമാണെങ്കില് അമിതിനോട് ചോദിക്കാമെന്നും പറയുന്നു. ചര്ച്ച അവസാനിക്കുമ്പോള് തനിക്ക് ‘ഹാഷ്’ ആണ് വേണ്ടതെന്നും ‘കഞ്ചാവ്’ അല്ലെന്നും ദീപിക വ്യക്തമാക്കുന്നുണ്ട്.
റിയ ചക്രവര്ത്തിയുടെ വെളിപ്പെടുത്തലുകളുടെ അടിസ്ഥാനത്തില് നടിമാരായ ശ്രദ്ധാ കപൂര്, സാറാ അലിഖാന്, രാകുല് പ്രീത് സിങ് എന്നിവരെ ചോദ്യം ചെയ്യുന്നത്.
