ദുബായ്: ചെന്നൈ സൂപ്പര് കിങ്സിനെതിരായ ഐപിഎല് മത്സരത്തില് രാജസ്ഥാന് റോയല്സിന് കൂറ്റന് സ്കോര്. മലയാളി താരം സഞ്ജു സാംസണിന്റെയും നായകന് സ്റ്റീവ് സ്മിത്തിന്റെയും അര്ധസെഞ്ചുറി കരുത്തില് രാജസ്ഥാന് 20 ഓവറില് ഏഴ് വിക്കറ്റ് നഷ്ടത്തില് 216 റണ്സ് നേടി. ഇതാദ്യമായാണ് ഈ സീസണില് ഒരു ടീം ഇരുനൂറ് കടക്കുന്നത്. അവസാന ഓവറില് ജോഫ്രെ ആര്ച്ചര് നടത്തിയ വെടിക്കെട്ട് ബാറ്റിങ്ങാണ് ടീമിനെ വലിയ സ്കോറിലേക്കെത്തിച്ചത്.
നേരത്തെ ഓപ്പണറായി ഇറങ്ങിയ സ്മിത്തിന്റെയും സാംസണിന്റെയും ബലത്തില് അതിവേഗം മുന്നോട്ടുനീങ്ങിയ രാജസ്ഥാനെ തുടര്ച്ചയായ വിക്കറ്റുകളിലൂടെ ചെന്നൈ പിടിച്ചുകെട്ടി. തകര്പ്പന് ബാറ്റിങ് നടത്തിയ സാംസണ് 32 പന്തില് 74 റണ്സ് നേടി. ഒമ്പത് സിക്സുകള് അടങ്ങുന്നതാണ് ഇന്നിങ്സ്. സ്മിത്ത് 47 പന്തില് 69 റണ്സ് നേടി. അവസാന ഓവറിലെ ആദ്യ നാല് പന്തുകള് സിക്സറടിച്ച ആര്ച്ചര് രാജസ്ഥാനെ വലിയ സ്കോറിലേക്കെത്തിക്കുകയായിരുന്നു. ആര്ച്ചര് എട്ടു പന്തില് നിന്ന് 27 റണ്സ് നേടി. ചെന്നൈക്കായി സാം കറന് മൂന്ന് വിക്കറ്റ് വീഴ്ത്തി. നേരത്തെ ടോസ് നേടിയ ചെന്നൈ ബൗളിങ് തെരഞ്ഞെടുക്കുകയായിരുന്നു.
ജന്മഭൂമി ഓണ്ലൈന്