ആനചികിത്സാ വിദഗ്ധൻ അവണപ്പറമ്പ് മഹേശ്വരൻ നമ്പൂതിരിപ്പാട് അന്തരിച്ചു, വിഷചികിത്സാരംഗത്തും വിദഗ്‌ദ്ധൻ

തൃശൂർ: പ്രശസ്ത ആനചികിത്സാ വിദഗ്ധൻ അവണപ്പറമ്പ് മഹേശ്വരൻ നമ്പൂതിരിപ്പാട് (90)  അന്തരിച്ചു. വ്യാഴാഴ്ച രാത്രി 12 മണിയോടെയായിരുന്നു അന്ത്യം. ഗുരുവായൂർ ദേവസ്വം ഉൾപ്പെടെ മിക്ക ദേവസ്വങ്ങളുടെയും ആനകളെ ചികിത്സിച്ചിരുന്നത് അവണപ്പറമ്പായിരുന്നു.

ഒരുമാസം മുമ്പെ ആയിരുന്നു നവതി ആഘോഷം. ഭാര്യ: ശ്രീദേവി അന്തർജനം. മക്കൾ: ഡോ. ശങ്കരൻ, ഗിരിജ. മരുമക്കൾ: മഞ്ജു, കൃഷ്ണൻ ഭട്ടതിരിപ്പാട്.  ശവസംസ്‌കാരം കുമ്പളങ്ങാട് അവണപ്പറമ്പ് മനയിൽ ഇന്ന് രാവിലെ പത്ത് മണിക്ക് നടന്നു. അഞ്ഞൂറോളം ആനകളുടെ അസുഖങ്ങൾ ചികിത്സിച്ച് ഭേദമാക്കിയ പ്രശസ്ത ചികിത്സകനാണ്. റേഡിയോ എഞ്ചിനീയറായി തുടങ്ങിയ  മഹേശ്വരൻ നമ്പൂതിരിപ്പാട് പിന്നീട് അരനൂറ്റാണ്ടിലധികം വിഷചികിത്സാരംഗത്തും സജീവമായി. പാമ്പുകടിയേറ്റ ആയിരക്കണക്കിന് ആളുകളെ ജീവിതത്തിലേക്ക് തിരിച്ചുകൊണ്ടുവന്നിട്ടുണ്ട്. കവി എന്ന നിലയിലും ശ്ലോകരംഗത്തും സജീവമായിരുന്നു.

വിഷചികിത്സയെക്കുറിച്ച് ഗ്രന്ഥമെഴുതിയ അവണപ്പറമ്പിനെത്തേടി രാജ്യത്തിനകത്തുനിന്നും പുറത്തുനിന്നും നിരവധി വിദ്യാർഥികൾ പഠനത്തിനായി നിരന്തരം മനയിലെത്തിയിരുന്നു. എല്ലാ ദേവസ്വങ്ങളും സേവനങ്ങൾ മുൻനിർത്തി ഇദ്ദേഹത്തെ ആദരിച്ചിട്ടുണ്ട്. ‌ മഹേശ്വരൻ നമ്പൂതിരിപ്പാടിന്റെ അച്ഛനും മുത്തച്ഛനും പേരുകേട്ട ആനചികിത്സകരായിരുന്നു.