മുംബൈ: തന്റെ ഓഫീസ് തകര്‍ത്ത ശിവസേന സര്‍ക്കാരിനെതിരെ രൂക്ഷവിമര്‍ശനവുമായി ബോളിവുഡ് നടി കങ്കണ റണാവത്ത്. ബാല്‍താക്കറെയുടെ ആശയമാണ് ശിവസേനയെ സൃഷ്ടിച്ചത്. ഇപ്പോള്‍ അധികാരത്തിനായി അവര്‍ താക്കറെയുടെ ആശയങ്ങളെ വില്‍പനക്ക് വെച്ചിരിക്കുകയാണ്. ഗുണ്ടകളെ ഉപയോഗിച്ച് എന്റെ വീട് തകര്‍ത്ത് ഭരണഘടനയെ നോക്കുകുത്തിയാക്കരുതെന്നും കങ്കണ പറഞ്ഞു. ബൃഹന്‍മുംബൈ മുനിസിപ്പല്‍ കോര്‍പ്പറേഷന്‍ അധികൃതര്‍ ഭാഗികമായി തകര്‍ത്ത തന്റെ ഓഫീസ് കെട്ടിടം സന്ദര്‍ശിച്ചശേഷമാണ് അവര്‍ ഇക്കാര്യം പറഞ്ഞത്.
ആശയങ്ങളില്‍ വെള്ളംചേര്‍ത്ത് ശിവസേന ഇപ്പോള്‍ സോണിയ സേനയായി മാറിയെന്നും കങ്കണ പറഞ്ഞു. ശിവസേനയുമായി സഖ്യമുണ്ടാക്കിയതാണ് മഹാരാഷ്‌ട്ര മുന്‍ മുഖ്യമന്ത്രി ദേവേന്ദ്ര ഫഡ്‌നാവിസ് ചെയ്ത കുറ്റം. തെരഞ്ഞെടുപ്പില്‍ തോറ്റതിന് പിന്നാലെ നാണമില്ലാതെ കോണ്‍ഗ്രസുമായി ചേര്‍ന്ന് ശിവസേന സര്‍ക്കാറുണ്ടാക്കിയെന്നും കങ്കണ പറഞ്ഞു.
കഴിഞ്ഞ ദിവസം അനധികൃത നിര്‍മാണമെന്ന് ആരോപിച്ചാണ് കോര്‍പ്പറേഷന്‍ അധികൃതര്‍ മണികര്‍ണിക ഓഫീസ് പൊളിച്ചു തുടങ്ങിയത്. ഭാഗികമായി തകര്‍ക്കപ്പെട്ട ഓഫീസ് കെട്ടിടത്തിലെ വിവിധ മുറികള്‍ നടി ഇന്ന് സന്ദര്‍ശിച്ചു. അംഗരക്ഷകര്‍ക്കും സഹായികള്‍ക്കും ഒപ്പമാണ് കങ്കണ ഓഫീസ് കെട്ടിടം സന്ദര്‍ശിക്കാനെത്തിയത്.
പ്രതികരിക്കാൻ ഇവിടെ എഴുതുക: