ലഖ്‌നൗ: അയോധ്യയില്‍ ശ്രീരാമക്ഷേത്രം നിര്‍മിക്കുന്നത് പൗരാണിക ക്ഷേത്ര വാസ്തുശില്‍പ്പ ശൈലിയായ നാഗാര രീതിയില്‍. മനോഹരമായ ശില്‍പ്പ ഭംഗിയിലുള്ള അഞ്ച് മണ്ഡപങ്ങളും 161 അടി പൊക്കത്തിലുള്ള ശിഖരവും (ഗോപുരം) ക്ഷേത്രത്തിന്റെ പ്രത്യേകതയാണ്. വാസ്തുശാസ്ത്രമനുസരിച്ച് മൂന്ന് നിലകളിലാണ് ക്ഷേത്രം നിര്‍മിക്കുന്നത്. പൂര്‍ത്തിയാകാന്‍ മൂന്നര വര്‍ഷമെടുക്കും. 1990ല്‍ ക്ഷേത്രത്തിന്റെ രൂപരേഖ തയാറാക്കി ജോലികള്‍ ആരംഭിക്കുമ്പോള്‍ രണ്ട് മണ്ഡപങ്ങളും 141 അടി പൊക്കത്തിലുള്ള ഒരു ശിഖരവുമായിരുന്നു. പുതിയ സാഹചര്യത്തിനനുസരിച്ചാണ് രൂപരേഖയില്‍ ഇപ്പോള്‍ മാറ്റംവരുത്തിയത്.
ഗര്‍ഭഗൃഹം, കുടു മണ്ഡപം, നൃത്ത്യ മണ്ഡപം എന്നിങ്ങനെ മൂന്ന് മണ്ഡപങ്ങളായിരുന്നു ആദ്യത്തേതില്‍. ഇപ്പോള്‍ ക്ഷേത്രത്തിന്റെ ഇരുവശങ്ങളിലുമായി കീര്‍ത്തന മണ്ഡപവും പ്രാര്‍ത്ഥനാ മണ്ഡപവും ചേര്‍ത്ത് രംഗമണ്ഡപമാണ് പുതുതായി ചേര്‍ത്തിരിക്കുന്നതെന്ന് ക്ഷേത്രനിര്‍മാണത്തിന്റെ മുഖ്യശില്‍പ്പി ചന്ദ്രകാന്ത് സോംപുരയുടെ മകനും ശില്‍പ്പിയുമായ ആഷിഷ് സോംപുര പറഞ്ഞു. 212 തൂണുകളെന്നത് 360 ആയിട്ടുണ്ട്.
പ്രതികരിക്കാൻ ഇവിടെ എഴുതുക: