മൂലമറ്റം: അറക്കുളം മൈലാടിയില്‍ കരിങ്കല്ല് ഇറക്കാന്‍ ശ്രമിക്കുന്നതിനിടെ റോഡിന്റെ വശം ഇടിഞ്ഞ് ടിപ്പര്‍ ലോറി നൂറടി താഴ്ചയിലേക്ക് മറിഞ്ഞു. ഡ്രൈവര്‍ കാഞ്ഞാര്‍ കറുകയില്‍ അഭിജിത്തിന് പരിക്കേറ്റു.
മൈലാടി നരിമറ്റത്തില്‍ സിബിയുടെ പുരയിടത്തില്‍ കല്ല് ഇറക്കുമ്പോള്‍ അയല്‍വാസിയുടെ വീട്ടിലേക്കുള്ള റോഡിന്റെ വശം ഇടിഞ്ഞാണ് അപകടം സംഭവിച്ചത്. ഇന്നലെ ഉച്ചയ്‌ക്ക് 12 മണിയോടെയാണ് അപകടം. തലക്ക് പരിക്ക് പറ്റിയ അഭിജിത്തിനെ അതുവഴി വന്ന ജീപ്പില്‍ കയറ്റി മൂലമറ്റത്തെ സ്വകാര്യ ആശുപത്രിയിലും പിന്നീട് തൊടുപുഴയിലെ സ്വകാര്യ ആശുപത്രിയിലും എത്തിച്ചു.
തൊടുപുഴയില്‍ നിന്നും വിദഗ്ധ ചികിത്സക്കായി കോലഞ്ചേരി മെഡിക്കല്‍ മിഷന്‍ ആശുപത്രിയിലേക്ക് മാറ്റി. കുടയത്തുര്‍ സ്വദേശിയുടെ ഉടമസ്ഥതയിലുള്ളതാണ് അപകടത്തില്‍ പെട്ട ടിപ്പര്‍ ലോറി.
പ്രതികരിക്കാൻ ഇവിടെ എഴുതുക: