തിരുവനന്തപുരം: മുഖ്യമന്ത്രിയുടെ ഓഫീസ് ഉള്പ്പെട്ട സ്വര്ണക്കടത്തു കേസില് എന്ഐഎ അന്വേഷണം സെക്രട്ടറിയേറ്റിലേക്ക് നീളുന്നു. സെക്രട്ടറിയേറ്റിലെ സിസിടിവി ക്യാമറ ദൃശ്യങ്ങള് എന്ഐഎ ആവശ്യപ്പെട്ടു. ഇന്നു രാവിലെയാണ് എന്ഐഎ ഉദ്യോഗസ്ഥരെത്തി ദൃശ്യങ്ങള് ആവശ്യപ്പെട്ടത്.
പൊതുഭരണവകുപ്പിന് കീഴിലുള്ള ഹൗസ് കീപ്പിംഗ് വിഭാഗവുമായാണ് എന്ഐഎ ആദ്യം ബന്ധപ്പെട്ടത്. ചീഫ് സെക്രട്ടറിയുടെ അനുമതിയുണ്ടെങ്കില് ദൃശ്യങ്ങള് കൈമാറാന് സാധിക്കുമെന്ന് ഹൗസ് കീപ്പിംഗ് അഡീഷണല് സെക്രട്ടറി പി.ഹണി എന്ഐഎയ്ക്ക് മറുപടി നല്കി. എന്ഐഎ ഡിവൈഎസ്പിയുടെ നേതൃത്വത്തിലുള്ള സംഘമെത്തിയാണ് വിവരങ്ങള് തേടിയത്. വിവരശേഖരണം ഏതാണ്ട് രണ്ടര മണിക്കൂറോളം നീണ്ടുനില്ക്കുകയും ചെയ്തു.
സെക്രട്ടറിയേറ്റിലെ ചിലനിരീക്ഷണ ക്യാമറകള് ഇടിമിന്നലില് തകര്ന്നതായുളള വാര്ത്തകള് പുറത്തുവന്നിരുന്നു. അവയുടെ അറ്റകുറ്റപ്പണികള്ക്കുളള അനുമതി നല്കിക്കൊണ്ടുളള ഉത്തരവും പുറത്തിറക്കിയിരുന്നു. ഇതിനു പിന്നാലെയാണ് എന്ഐഎ സിസിടിവി ദൃശ്യങ്ങള്ക്കായി സെക്രട്ടറിയേറ്റില് എത്തിയത്.
