തൃശൂര്‍: കഴിഞ്ഞ മാസം ചാവക്കാട് കടലില്‍ മൂന്ന് മത്സ്യത്തൊഴിലാളി യുവാക്കള്‍ മുങ്ങിമരിച്ച സംഭവത്തില്‍ സംസ്ഥാന സര്‍ക്കാര്‍ പക്ഷപാതിത്വം കാണിക്കുകയാണെന്ന് ബിജെപി സംസ്ഥാന പ്രസിഡന്റ് കെ. സുരേന്ദ്രന്‍. യുവാക്കള്‍ കടലില്‍ മുങ്ങിപോയപ്പോള്‍ രക്ഷാദൗത്യത്തിന് സഹായിക്കാതിരുന്ന സര്‍ക്കാര്‍ മരണാനന്തരം ഒരു സഹായവും ചെയ്തില്ല. അപകടത്തില്‍ മരിച്ച വിഷ്ണു, ജിഷ്ണു, ജഗനാഥ് എന്നിവരുടെ വീടുകള്‍ സന്ദര്‍ശിച്ച ശേഷം മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
സ്വന്തം നാട്ടില്‍ മൂന്ന് ചെറുപ്പക്കാര്‍ മുങ്ങിമരിച്ചിട്ടും അവിടേക്ക് തിരിഞ്ഞു നോക്കാതിരുന്ന മന്ത്രി എ.സി. മൊയ്തീന്‍ വിവേചനപരമായാണ് പെരുമാറിയത്. ഗുരുവായൂര്‍ എംഎല്‍എ അബ്ദുള്‍ ഖാദറും ടി.എന്‍ പ്രതാപന്‍ എം.പിയും ഈ വിഷയത്തില്‍ തീര്‍ത്തും നിരുത്തരവാദപരമായാണ് പെരുമാറിയത്. രാഷ്‌ട്രീയ കൊലപാതകങ്ങള്‍ക്കും ഇടതുമുന്നണി നേതാക്കളുടെ ബാങ്ക് കടം വീട്ടാനും മുഖ്യമന്ത്രിയുടെ ദുരിതാശ്വാസ നിധിയില്‍ നിന്ന് പണം അനുവദിക്കുന്ന സര്‍ക്കാര്‍ പാവപ്പെട്ട യുവാക്കള്‍ക്ക് നായാപൈസ അനുവദിച്ചിട്ടില്ല. മത്സ്യത്തൊഴിലാളികളായതുകൊണ്ടും സംഘടിത വോട്ടുബാങ്കല്ലാത്തതു കൊണ്ടുമാണ് ഈ യുവാക്കള്‍ക്ക് നീതികിട്ടാതിരുന്നതെന്ന് അദ്ദേഹം കൂട്ടിച്ചേര്‍ത്തു.
സര്‍ക്കാര്‍ രണ്ട് തരത്തിലാണ് ജനങ്ങളെ കാണുന്നത്. മരിച്ചവരുടെ ആശ്രിതര്‍ക്ക് 25 ലക്ഷം രൂപയും കുടുംബത്തിലൊരാള്‍ക്ക് സര്‍ക്കാര്‍ ജോലിയും നല്‍കാന്‍ സര്‍ക്കാര്‍ തയ്യാറാവണമെന്ന് സുരേന്ദ്രന്‍ ആവശ്യപ്പെട്ടു. സ്വര്‍ണ്ണക്കള്ളക്കടത്തുകാരായ സ്വപ്നയ്‌ക്കും സരിത്തിനും വരെ പിന്‍വാതിലിലൂടെ ജോലി തരപ്പെടുത്തി നല്‍കുന്ന സര്‍ക്കാര്‍ അര്‍ഹതപ്പെട്ടവരെ അവഗണിക്കുകയാണ്. മത്സ്യത്തൊഴിലാളി കുടുംബങ്ങള്‍ക്ക് നീതി ലഭ്യമാക്കാനായി തീരദേശ മേഖലയില്‍ പ്രക്ഷോഭം തുടങ്ങുമെന്നും കെ. സുരേന്ദ്രന്‍ പറഞ്ഞു. ബിജെപി ജില്ലാപ്രസിഡന്റ് അഡ്വ കെ.കെ. അനീഷ്‌കുമാര്‍, ജില്ലാ സെക്രട്ടറി അനീഷ്, ജില്ലാ ട്രഷറര്‍ സുജയ്സേനന്‍, മണ്ഡലം പ്രസിഡന്റ് അനില്‍ മണ്‍ചിറമ്പത്ത്, പഞ്ചായത്ത് പ്രസിഡന്റ് ഗണേഷ് എന്നിവരും സുരേന്ദ്രനോടൊപ്പം ഉണ്ടായിരുന്നു.
പ്രതികരിക്കാൻ ഇവിടെ എഴുതുക: