ചെറുതോണി: വിദേശമദ്യവുമായി പിടിയിലായ പ്രതിക്ക് പിന്നീട് കൊറോണ സ്ഥിരീകരിച്ചതോടെ ഇടുക്കി സ്റ്റേഷനിലെ എസ്‌ഐമാരുള്‍പ്പെടെ 10 പോലീസുകാര്‍ ക്വാറന്റൈനിലായി. വില്‍പ്പനക്കായി വിദേശമദ്യം വാഹനത്തിലെത്തിച്ച സംഭവത്തില്‍ കഴിഞ്ഞദിവസം കസ്റ്റഡിയിലെടുത്ത മണിയാറന്‍കുടി സ്വദേശിയ്‌ക്കാണ് ഇന്നലെ രോഗം സ്ഥിരീകരിച്ചത്.
നാല് പേര്‍ക്കാണ് പ്രാഥമിക സമ്പര്‍ക്കം ഉണ്ടായിരുന്നതെങ്കിലും ആ സമയം ഓഫീസിലുണ്ടായിരുന്ന മറ്റുള്ളവരും ക്വാറൈന്റനില്‍ പോവുകയായിരുന്നു. അഗ്നിരക്ഷാ സേനയെത്തി പോലീസ് സ്‌റ്റേഷനും പരിസരവും അണുവിമുക്തമാക്കി. 10 ജീവനക്കാര്‍ കുറഞ്ഞത് പ്രവര്‍ത്തനത്തെ സാരമായി ബാധിക്കുന്നുണ്ട്.
കസ്റ്റഡിയിലായ പ്രതി കട്ടപ്പന ഭാഗത്ത് നിന്ന് ബസിലാണ് ചെറുതോണിയിലെത്തിയത്. ഇവിടെ നിന്നും ഓട്ടോറിക്ഷ വിളിച്ച് മണിയാറന്‍കുടിക്ക് പോകും വഴിയാണ് പിടിയിലാകുന്നത്. ഇയാളെ കൊണ്ടുപോയ ഓട്ടോറിക്ഷ ഡ്രൈവറും ബസിലെ യാത്രക്കാരും നിരീക്ഷണത്തില്‍ പോകേണ്ടി വരും. കരിമ്പനില്‍ രോഗം പിടിപെട്ട വാഴത്തോപ്പ് സ്വദേശിയുടെ ഭാര്യയും മകനും ചെറുതോണിയിലെ നിരവധി വ്യാപാര സ്ഥാപനത്തിലും ബാങ്കിലും കയറിയതായി വിവരമുണ്ട്. രോഗികള്‍ കൂടിയതിനാല്‍ ചെറുതോണി ടൗണില്‍ വ്യാപാര സ്ഥാപനങ്ങള്‍ തുറക്കാന്‍ ഉടമകള്‍ ഭയക്കുകയാണ്.
വാഴത്തോപ്പ് പഞ്ചായത്തില്‍പെട്ട കരിമ്പനിലാണ് ഏറ്റവുമധികം രോഗബാധിതരുള്ളത്. ടൗണിലെ ഒരു ഹോട്ടലുമായി ബന്ധപ്പെട്ടാണ് നിരവധിപേര്‍ക്ക് രോഗം കണ്ടെത്തിയിരിക്കുന്നത്. ഇതിനെ തുടര്‍ന്ന് കരിമ്പന്‍ ടൗണ്‍ പൂര്‍ണമായും അടച്ചിരിക്കുകയാണ്. ഇന്നലെ മാത്രം കരിമ്പനില്‍ അഞ്ച് പേര്‍ക്ക് രോഗം സ്ഥിരീകരിച്ചു. കഞ്ഞിക്കുഴി സ്വദേശിയായ മൃഗാശുപത്രി ജീവനക്കാരിയില്‍ നിന്നുള്ള സെക്കന്‍ഡറി കോണ്‍ടാക്ട് വഴിയാണ്് ഇവര്‍ക്ക് രോഗം പകര്‍ന്നത്.
അടിമാലി ഫയര്‍ ഫോഴ്‌സ് യൂണിറ്റ് അടച്ചു
കൊറോണ രോഗികളുമായി ബന്ധപ്പെട്ടുണ്ടായ സമ്പര്‍ക്കത്തെ തുടര്‍ന്ന് അടിമാലി ഫയര്‍ഫോഴ്‌സ് യൂണിറ്റ് അടച്ചു. 8 ജീവനക്കാരാണ് നിരീക്ഷണത്തിലായി. രാജാക്കാട് പ്രാഥാമിക ആരോഗ്യ കേന്ദ്രത്തിലെ ജീവനക്കാര്‍ക്ക് ശനിയാഴ്ച രോഗം സ്ഥിരീകരിച്ചിരുന്നു. ഇവരുമായി നേരിട്ട് ഫയര്‍ഫോഴ്‌സ് ജീവക്കാര്‍ക്ക് സമ്പര്‍ക്കം ഉണ്ടായതിനെ തുടര്‍ന്നാണ് നടപടി.
കഴിഞ്ഞ 14ന് രാജാക്കാട് ആരോഗ്യ കേന്ദ്രത്തില്‍ അണുനശീകരണ പ്രവര്‍ത്തനങ്ങള്‍ക്ക് വേണ്ടിയാണ് അടിമാലിയില്‍ നിന്ന് ഫയര്‍ഫോഴ്‌സ് ജീവനക്കാര്‍ എത്തിയത്. ഇവിടെ സഹായത്തിനെത്തിയവര്‍ക്കാണ് രോഗം കണ്ടെത്തിയത്. യൂണിറ്റിലെ 3 പേര്‍ ഒഴികെ ഉള്ളവര്‍ നിരീക്ഷണത്തിലായത്. ഇവരെ ഫയര്‍ഫോഴ്‌സ് യൂണിറ്റില്‍ തന്നെയാണ് നീരിക്ഷണത്തിലാക്കിയിരിക്കുന്നത്.
പ്രതികരിക്കാൻ ഇവിടെ എഴുതുക: