ആലുവ: ആര്എസ്എസ് മണ്ഡല് കാര്യവാഹ് രജിത്തിനെ വഴിയില് തടഞ്ഞ് നിര്ത്തി മാരകായുധങ്ങള് ഉപയോഗിച്ച് കൊലപ്പെടുത്താന് ശ്രമിച്ച കേസില് മൂന്ന് പ്രതികള് കൂടി പിടിയില്. ഇതോടെ കേസില് പിടിയിലായവരുടെ എണ്ണം എട്ടായി.
ചാലക്കല് ചിരുകണ്ടത്തില് വീട്ടില്, സുനീര് (31), കുട്ടമശേരി മുല്ലപ്പിള്ളി വീട്ടില്, റഫീക്ക് (42), കുട്ടമശേരി കോലയില് വീട്ടില്, റഹിം (45) എന്നിവരെയാണ് ആലുവ വെസ്റ്റ് പോലീസ് അറസ്റ്റ് ചെയ്തത്. രണ്ടാം പ്രതിയായ ഫൈസല് ഹൈദര്അലി, മൂന്നാം പ്രതിയായ ഷഫീക്ക് എന്നിവരെ അറസ്റ്റ് ചെയിതിരുന്നു.
ജൂണ് 16ന് ആലുവ യുസി കോളേജിന് സമീപത്ത് വച്ച് കുട്ടമശേരി ചാലക്കല് കൊല്ലംകുടി വീട്ടില് കെ.വി. രാജന്റെ മകന് രജിത്തിനെയാണ് മുഖം മറച്ചെത്തിയ സംഘം വധിക്കാന് ശ്രമിച്ചത്. ഗുരുതരമായി പരിക്കേറ്റ രജിത്ത് ചികിത്സയ്ക്ക് ശേഷം വീട്ടില് നിരീക്ഷണത്തിലാണ്.
ചാലയ്ക്കലിലെ മതം മാറ്റവുമായി ബന്ധപ്പെട്ട വിവാദത്തില് രജിത്ത് ഇടപെട്ടതിന്റെ വൈരാഗ്യത്തിലായിരുന്നു ആക്രമണം. ആലുവ ഡിവൈഎസ്പി ജി. വേണുവിന്റെ നേതൃത്വത്തിലുള്ള അന്വേഷണ സംഘമാണ് കേസ് അന്വേഷിക്കുന്നത്.
