മോഷണം തുടർക്കഥ: പാടിയോട്ടുചാൽ അയ്യപ്പ ക്ഷേത്രത്തിൽ വൻ കവർച്ച

ചെറുപുഴ : മലയോരത്ത് മോഷണം തുടർക്കഥയാവുന്നു.പാടിയോട്ടുചാൽ ശ്രീ അയ്യപ്പ ക്ഷേത്രത്തിൽ കവർച്ച നടത്തി ഷേത്ര ശ്രീകോവിലിലെ വിഗ്രഹത്തിനു ചാർത്തിയ സ്വർണ്ണ മാലയും 8 ഭണ്ഡാരങ്ങളിലെ പണവും മോഷ്ടിച്ചു. ഉപക്ഷേത്രത്തിൽ ദേവീ വിഗ്രഹത്തിലുണ്ടായിരുന്ന സ്വർണ്ണത്താലിയും കവർന്നു. 3 ലക്ഷത്തിലേറെ രൂപയുടെ നഷ്ടമുള്ളതായി ക്ഷേത്രം ഭാരവാഹികൾ പറഞ്ഞു. 

ബുധനാഴ്ച രാത്രി 12 മണിയോടെയാണ് സംഭവം എന്ന് കരുതുന്നു. വ്യാഴാഴ്ച രാവിലെ ക്ഷേത്രത്തിൽ, മേൽശാന്തി മേക്കാട്ടില്ലം മഹേഷ് നമ്പൂതിരി,പൂജ നടത്താനെത്തിയപ്പോഴാണ് ക്ഷേത്രത്തിന്റെ പൂട്ട് തകർത്തതായി കണ്ടത്. തുടർന്ന്ക്ഷേത്രം ഭാരവാഹികൾ നല്കിയ പരാതിയെ തുടർന്ന് ചെറുപുഴ പോലീസ് സ്റ്റേഷൻ ഇൻസ്പെക്ടർ എം.പി. വിനീഷ് കുമാർ , പ്രിൻസിപ്പൽ എസ് ഐ മഹേഷ് കെ. നായർ എന്നിവരുടെ നേത്യത്വത്തിൽ അന്വേഷണം നടത്തി. കണ്ണൂരിൽ നിന്നുളള ഡോഗ് സ്ക്വാഡും, ഫോറൻസിങ്ങ് സംഘവും സ്ഥലത്തെത്തി പരിശോധന നടത്തി. തെളിവെടുത്തു. ഫോറൻസിങ്ങ്‌വിദഗ്ധ പി. സിന്ധുവാണ് തെളിവെടുത്തത്. 

ഡോഗ് സ്ക്വാഡിലെ സ്വീറ്റാ എന്ന നായ ക്ഷേത്രത്തിലെ ഭണ്ഡാരത്തിൽ മണം പിടിച്ച് ക്ഷേത്രത്തിന്റെ വടക്ക് ഭാഗത്തെ വാതിലിലൂടെ ചന്ദ്രവയൽ ഭാഗം വരെയാണ് പോയത്. ക്ഷേത്രത്തിന് സമീപത്തുളള കെട്ടിടത്തിലെ സി.സി. ടി വി ദൃശ്യങ്ങൾ പോലീസ് പരിശോധിച്ചു. കോട്ട് ധരിച്ച 2 ആൾക്കാരുടെ ദൃശ്യങ്ങൾ ഉളളതായി പൊലീസ് പറഞ്ഞു. അടുത്ത 2 ആഴ്ചയ്‌ക്കുള്ളിൽ നടക്കുന്ന രണ്ടാമത്തെ മോഷണമാണ് ക്ഷേത്രത്തിലേത്. 

2 ആഴ്ച മുമ്പേ ടൗണിലെ അമലാ ട്രേഡേഴ്സ് എന്ന വ്യാപാര സ്ഥാപനത്തിൽ മോഷണം നടന്നിരുന്നു. ഒരാഴ്ച മുമ്പേ പെരിങ്ങോം സ്റ്റേഷൻ പരിധിയിലെ അരവഞ്ചാൽ അയ്യപ്പ ഭജന മഠത്തിലെ ഭണ്ഡാരം മോഷ്ടിച്ചിരുന്നു. അരവഞ്ചാൽ ടൗണിലെ വ്യാപാര സ്ഥാപനം കുത്തിത്തുറന്ന് 6,000 രൂപയോളം മോഷ്ടിച്ചിരുന്നു. അടിക്കടി ഉണ്ടാക്കുന്ന കവർച്ചയിൽ ജനങ്ങൾ ആശങ്കാകുലരാണ്. ക്ഷേത്രത്തിലെ കവർചയിൽ ഊർജിതമായ അന്വേഷണം തുടങ്ങിയതായി പൊലീസ് അധികാരികൾ പറഞ്ഞു.