കുവൈത്ത് സിറ്റി: കൊറോണ ബാധിച്ച് തിരുവനന്തപുരം സ്വദേശി ജ്ഞാന മുത്തന്‍ തോമസ് (66) നിര്യാതനായി. കഴിഞ്ഞ രണ്ടാഴ്ചക്കാലമായി കുവൈത്ത് ജാബിര്‍ ആശുപത്രിയിൽ ചികിത്സയിലായിരുന്നു. തിരുവനന്തപുരം നെയ്യാറ്റിന്‍കര മങ്കുഴി സ്വദേശിയാണ്. സ്വകാര്യ സ്ഥാപനത്തില്‍ ഡ്രൈവറായി ജോലിചെയ്തുവരികയായിരുന്നു.
മൃതദേഹം കൊറോണ പ്രോട്ടോകോൾ പ്രകാരം കുവൈത്തിൽ സംസ്കരിച്ചു. അതേസമയം കഴിഞ്ഞ 24 മണിക്കൂറിനുള്ളില്‍ 4,341 സാമ്പിളുകള്‍ ആരോഗ്യമന്ത്രാലയം പരിശോധിച്ചതില്‍ 791 പേരിലാണ് രോഗം സ്ഥിരീകരിച്ചത്. ഇതോടെ കൊറോണ രോഗം ബാധിച്ച രാജ്യത്തെ ആകെ എണ്ണം 57,668 ആയി.
648 പേര്‍ക്ക് കൂടി രോഗം ഭേദമായതോടെ ആകെ 47,545 പേരാണ് രോഗമുക്തരായത്. ചികിത്സയിലായിരുന്ന മൂന്നുപേരുടെ മരണമാണ് ഇന്ന് റിപ്പോര്‍ട്ട് ചെയ്തത്. ഇതോടെ രാജ്യത്തെ ആകെ കൊറോണ മരണസംഖ്യ 402 ആയി. പുതിയ കൊറോണ കേസുകളില്‍ കുവൈത്ത് സ്വദേശികൾ 459 പേരും 332 പേര്‍ വിദേശികളുമാണ്.
ചികിത്സയിലുള്ള 9,721 പേരില്‍ 142 പേരുടെ നില അതീവ ഗുരുതരമാണെന്ന് ആരോഗ്യ മന്ത്രാലയ വക്താവ് അബ്ദുള്ള അല്‍ സനദ് വാര്‍ത്താസമ്മേളനത്തില്‍ അറിയിച്ചു.
പ്രതികരിക്കാൻ ഇവിടെ എഴുതുക: