യുണൈറ്റഡിന് സമനില; ചാമ്പ്യന്‍സ് ലീഗ് ഉറപ്പിക്കാനുള്ള സുവര്‍ണാവസരം തുലച്ചു

മാഞ്ചസ്റ്റര്‍: ചാമ്പ്യന്‍സ് ലീഗില്‍ സ്ഥാനം ഉറപ്പിക്കാനുള്ള അവസരം കളഞ്ഞുകുളിച്ച് മാഞ്ചസ്റ്റര്‍ യുണൈറ്റഡ്. ഇംഗ്ലീഷ് പ്രീമിയര്‍ ലീഗില്‍ സതാംപ്ടണിനെതിരെ സമനിലയില്‍ കുരുങ്ങിയതോടെയാണ് ആദ്യ നാലിലെത്താനാവുന്ന സുവര്‍ണാവസരം നഷ്ടപ്പെട്ടത്. നിലവില്‍ അഞ്ചാം സ്ഥാനത്താണ് യുണൈറ്റഡ്. അവസാന മിനിറ്റിന്റെ അധിക സമയത്ത് വഴങ്ങിയ ഗോളാണ് വിനയായത്.  

മാര്‍കസ് റാഷ്‌ഫോര്‍ഡിന്റെയും (20) ആന്റണി മാര്‍ഷ്യലിന്റെയും (23) ഗോളുകളാണ് ആദ്യ പകുതിയില്‍ തന്നെ യുണൈറ്റഡിനെ മുന്നിലെത്തിച്ചത് 12-ാം മിനിറ്റില്‍ സ്റ്റുവര്‍ട്ട് ആംസ്‌ട്രോങ് സതാംപ്ടണിനായി ഗോള്‍ നേടി. മൈക്കിള്‍ ഒബ്‌ഫെമി രണ്ടാം പകുതിയുടെ അധിക സമയത്ത് നിര്‍ണ്ണായക ഗോള്‍ നേടുകയായിരുന്നു. മത്സരം വിജയിച്ചിരുന്നെങ്കില്‍ യുണൈറ്റഡിന് മൂന്നാം സ്ഥാനത്തേക്ക് മുന്നേറാമായിരുന്നു. നിലവില്‍ 35 മത്സരങ്ങളില്‍ നിന്ന് 59 പോയിന്റാണ് യുണൈറ്റഡിനുള്ളത്. 35 മത്സരങ്ങളില്‍ നിന്ന് 60 പോയിന്റുള്ള ചെല്‍സി മൂന്നാമതും 59 പോയിന്റുമായി ലെസ്റ്റര്‍ സിറ്റി നാലാമതുമാണ്. ലീഗില്‍ മൂന്ന് മത്സരം കൂടി യുണൈറ്റഡിന് ബാക്കിയുണ്ട്.