കുമ്പളയില്‍ അഞ്ചും, മംഗല്‍പാടിയില്‍ ആറും വാര്‍ഡുകള്‍ കണ്ടെയ്ന്‍മെന്റ് സോണ്‍

കുമ്പള: കുമ്പള പഞ്ചായത്തിലെ അഞ്ച് വാര്‍ഡുകളും മംഗല്‍പ്പാടി പഞ്ചായത്തിലെ ആറ് വാര്‍ഡുകളും കണ്ടെയ്ന്‍മെന്റ് സോണുകള്‍. കുമ്പള പഞ്ചായത്തിലെ 3, 6, 14, 15, 20 വാര്‍ഡുകളും മംഗല്‍പ്പാടി പഞ്ചായത്തിലെ 12, 13,15, 17, 19, 21 വാര്‍ഡുകളുമാണ് കോവിഡ് കേസുകള്‍ റിപ്പോര്‍ട്ട് ചെയ്യപ്പെട്ടതിനെ തുടര്‍ന്ന് കണ്ടെയ്ന്‍മെന്റ് സോണുകളായത്. ഇവിടങ്ങളില്‍ ശക്തമായ നിരീക്ഷണമേര്‍പ്പെടുത്തുമെന്ന് കുമ്പള സ്റ്റേഷന്‍ ഹൗസ് ഓഫീസര്‍ പി. പ്രമോദ് പറഞ്ഞു. മെഡിക്കല്‍ ഷോപ്പും അവശ്യ സാധനങ്ങളുടെ കടകളും ഒന്നിടവിട്ട ദിവസങ്ങളില്‍ രാവിലെ 11 മുതല്‍ വൈകിട്ട് 5 വരെ പ്രവര്‍ത്തിക്കും. മറ്റു കടകള്‍ തുറക്കാന്‍ ആവില്ല. ആളുകള്‍ അനാവശ്യമായി പുറത്തിറങ്ങുന്നതും വിലക്കി. ഈ ഭാഗങ്ങളില്‍ കുമ്പള, മഞ്ചേശ്വരം പൊലീസ് പരിശോധന നടത്തും. കണ്ടെയ്ന്‍മെന്റ് സോണുകളിലെ പോക്കറ്റ് റോഡുകളില്‍ പലതും അടച്ചിടും.