തിരുവനന്തപുരം:സംസ്ഥാനത്ത് മെയ് ഏഴിനുശേഷം ഇന്നലെ വരെ 870 വിമാനങ്ങളും 3 കപ്പലുകളും വിദേശങ്ങളില്നിന്ന് വന്നു. 600 ചാര്ട്ടേര്ഡ് ഫ്ളൈറ്റുകളാണ്. ഏറ്റവും കൂടുതല് വിമാനങ്ങള് വന്നത് യുഎഇയില് നിന്നാണ്. 446 വിമാനങ്ങളിലായി 73,212 പേരാണ് വന്നത്. കോഴിക്കോട്ട് 222ഉം കൊച്ചിയില് 201ഉം കണ്ണൂരില് 104 ഉം തിരുവനന്തപുരത്ത് 67ഉം വിമാനങ്ങളെത്തി.
ആകെ വന്ന 1,43,147 പേരില് 52 ശതമാനവും (74,849) തൊഴില് നഷ്ടപ്പെട്ടവരാണ്. വിസാ കാലാവധി തീര്ന്ന 46,257 പേരെത്തി. കേരളം ഇന്നലെ വരെ 1543 ഫ്ളൈറ്റുകള്ക്കാണ് അനുമതിപത്രം നല്കിയിട്ടുള്ളത്. കൂടുതല് വിമാനങ്ങള്ക്കായി അനുമതിപത്രം ലഭിക്കുന്നുണ്ട്.
151 പേര്ക്കാണ് ഇന്ന് കോവിഡ് ബാധ സ്ഥിരീകരിച്ചത്. 132 പേര് രോഗമുക്തി നേടി.ഇന്ന് രോഗം ബാധിച്ചവരില് 86 പേര് വിദേശത്തുനിന്ന് വന്നവരാണ്.
ഇതുവരെ 4593 പേര്ക്കാണ് സംസ്ഥാനത്ത് രോഗം സ്ഥിരീകരിച്ചത്. ചികിത്സയിലുള്ളത് 2130 പേരാണ്. 1,87,219 പേരാണ് നിരീക്ഷണത്തിലുള്ളത്. 2831 പേര് ആശുപത്രികളില്. ഇന്നു മാത്രം 290 പേരെ ആശുപത്രിയില് പ്രവേശിപ്പിച്ചു. ഇതുവരെ 1,81,780 സാമ്പിളുകള് ശേഖരിച്ച് പരിശോധനക്ക് അയച്ചു. 4042 സാമ്പിളുകളുടെ റിസള്ട്ട് വരാനുണ്ട്.
മടങ്ങിവരുന്ന പ്രവാസികളുടെ പുനരധിവാസവും സംസ്ഥാനത്തിന്റെ സമഗ്രവികസനവും ലക്ഷ്യമിട്ട് ‘ഡ്രീം കേരള’ എന്ന പദ്ധതി നടപ്പാക്കാന് മന്ത്രിസഭ തീരുമാനിച്ചതായി മുഖ്യമന്ത്രി പിണറായി വിജയന് പറഞ്ഞു.
വിദേശങ്ങളില് നിന്നും രാജ്യത്തിന്റെ മറ്റു ഭാഗങ്ങളില് നിന്നും കേരളത്തിലേക്ക് തിരിച്ചുവരുന്ന വലിയ വിഭാഗം പ്രൊഫഷണലുകളുണ്ട്. വിവിധ തൊഴിലുകളില് അന്താരാഷ്ട്ര വൈദഗ്ധ്യം നേടിയവരും സംരംഭങ്ങള് നടത്തി പരിചയമുള്ളവരുമാണ് ഇവരില് നല്ല പങ്ക്. ഇവരുടെ കഴിവിനെ സംസ്ഥാനത്തിന്റെ ഭാവിക്കു വേണ്ടി ഉപയോഗപ്പെടുത്തുക എന്ന ലക്ഷ്യം കൂടി ഈ പദ്ധതിക്കുണ്ട്.
കേരളത്തിന്റെ സാമ്പത്തിക വളര്ച്ചക്ക് നിര്ണായകമായ സംഭാവന നല്കുന്നവരാണ് വിദേശത്ത് ജോലി ചെയ്യുന്ന മലയാളികള്. ആളോഹരി വരുമാനം കേരളത്തില് ഉയര്ന്നുനില്ക്കുന്നതിന്റെ പ്രധാന കാരണം പ്രവാസികള് നാട്ടിലേക്ക് അയക്കുന്ന പണമാണ്.
2018ലെ സര്വെ പ്രകാരം ഒരു വര്ഷം പ്രവാസികള് നാട്ടിലേക്ക് അയക്കുന്ന തുക 85,000 കോടി രൂപയാണ്. ഇപ്പോള് അത് ഒരു ലക്ഷം കോടി രൂപയില് അധികമായിരിക്കും. 2018ലെ കണക്ക് പ്രകാരം (സാമ്പത്തിക അവലോകനം) കേരളത്തിലെ ബാങ്കുകളിലെ പ്രവാസി നിക്ഷേപം 1,69,944 കോടി രൂപയാണ്.
എന്നാല് കോവിഡ് മഹാമാരി ഈ രംഗത്ത് മറ്റൊരു പ്രതിസന്ധി സൃഷ്ടിച്ചിരിക്കുകയാണ്. സാമ്പത്തികാഘാതം എല്ലാ രാജ്യങ്ങളിലെയും വ്യവസായ-വാണിജ്യ സംരംഭങ്ങളെ കാര്യമായി ബാധിച്ചിട്ടുണ്ട്. ഈ സാഹചര്യത്തില് തൊഴില് നഷ്ടപ്പെട്ട് കൂടുതല് പേര് നാട്ടിലേക്ക് തിരിച്ചുവരുന്ന സാഹചര്യം സര്ക്കാര് ഗൗരവമായി വിലയിരുത്തിയതിന്റെ അടിസ്ഥാനത്തിലാണ് ഡ്രീം കേരള പദ്ധതി ആരംഭിക്കുന്നത്.
സംസ്ഥാന സര്ക്കാരിന്റെ വിവിധ വകുപ്പുകള് സംയുക്തമായി നടപ്പാക്കുന്ന പദ്ധതിയില് കേരളത്തിന്റെ ഭാവിയെ സംബന്ധിക്കുന്ന കാര്യങ്ങളില് പൊതുജനങ്ങള്ക്ക് നിര്ദേശങ്ങളും ആശയങ്ങളും സമര്പ്പിക്കാന് അവസരമുണ്ടാകും. തെരഞ്ഞെടുക്കപ്പെടുന്ന ആശയങ്ങള് എങ്ങനെ നടപ്പിലാക്കാമെന്നത് സംബന്ധിച്ച് ഹാക്കത്തോണ് നടത്തും.
