തിരുവനന്തപുരം: കൊറോണയുടെ പരീക്ഷണങ്ങളെ തോൽപ്പിച്ച് എസ്എസ്എൽസി പരീക്ഷ എഴുതിയ ജില്ലയിലെ വിദ്യാർഥികൾക്ക് മിന്നും വിജയം. 98.94 ശതമാനം വിജയമാണ് തലസ്ഥാനം നേടിയത്. മുമ്പെങ്ങുമില്ലാത്ത ആശങ്കയിലും അനിശ്ചിതത്വത്തിനുമിടയിലും പരീക്ഷയെഴുതിയ 34,689 പേരിൽ 34,332 പേർ ഉന്നതപഠനത്തിനുള്ള അർഹത നേടി. ഇതിൽ 17,378 പേർ ആൺകുട്ടികളും 16,944 പേർ പെൺകുട്ടികളുമാണ്. 3729 പേരാണ് ജില്ലയിൽ എല്ലാ വിഷയത്തിനും എ പ്ലസ് നേടിയത്.
നെയ്യാറ്റിൻകര വിദ്യാഭ്യാസ ജില്ലയിൽ 10,879 പേർ പരീക്ഷ എഴുതിയതിൽ 10,808 പേർ വിജയിക്കുകയും 1139 പേർ എല്ലാ വിഷയത്തിനും എപ്ലസ് നേടുകയും ചെയ്തു. തിരുവനന്തപുരം വിദ്യാഭ്യാസ ജില്ലയിൽ 10,828 പേർ പരീക്ഷ എഴുതിയതിൽ 10,730 പേർ വിജയിച്ചു. 1026 പേർ എല്ലാ വിഷയത്തിനും എ പ്ലസ് നേടി. ആറ്റിങ്ങൽ വിദ്യാഭ്യാസ ജില്ലയിൽ 12,982 പേർ പരീക്ഷ എഴുതിയതിൽ 12,784 പേർ വിജയിച്ചു. 1564പേർ എല്ലാ വിഷയത്തിനും എ പ്ലസ് നേടി.
കഴിഞ്ഞ വർഷത്തെ അപേക്ഷിച്ച് കൂടുതൽ വിദ്യാർഥികൾ ഇത്തവണ എല്ലാ വിഷയങ്ങൾക്കും എ പ്ലസ് നേടി. 148 സ്കൂളുകൾ നൂറുമേനി വിജയം സ്വന്തമാക്കി. സർക്കാർ സ്കൂളുകളിൽ 64 ഉം എയ്ഡഡിൽ 44 ഉം അൺഎയ്ഡഡിൽ 40 ഉം സ്കൂളുമാണ് നൂറുമേനി വിജയം കരസ്ഥമാക്കിയത്. കഴിഞ്ഞ വർഷം 97.96 ആയിരുന്നു ജില്ലയിലെ വിജയ ശതമാനം. ജില്ലയിലെ ഏറ്റവും അധികം എ പ്ലസ് ലഭിച്ചിരിക്കുന്ന വിദ്യാഭ്യാസ ജില്ല ആറ്റിങ്ങലാണ്. 1564 വിദ്യാർഥികൾക്കാണ് ഇവിടെ എ പ്ലസ് കിട്ടിയിരിക്കുന്നത്. തിരുവനന്തപുരം വിദ്യാഭ്യാസ ജില്ലയിൽ 1026 ഉം നെയ്യാറ്റിൻകര വിദ്യാഭ്യാസ ജില്ലയിൽ 1139 പേർക്കും എല്ലാ വിഷയത്തിനും എ പ്ലസ് ലഭിച്ചു.
ഇക്കുറിയും ജില്ലയിൽ ഏറ്റവും കൂടുതൽ വിദ്യാർഥികളെ പരീക്ഷയ്ക്കിരുത്തിയത് പട്ടം സെന്റ് മേരീസ് എച്ച്എസ്എസ് ആണ്. 1785 വിദ്യാർഥികൾ പരീക്ഷ എഴുതിയതിൽ ഒരു വിദ്യാർഥിയൊഴിച്ച് ബാക്കി വിദ്യാർഥികൾ വിജയിച്ചു. 99.94 ശതമാനമാണ് സ്കൂളിന്റെ വിജയശതമാനം. 55 ഭിന്നശേഷി വിദ്യാർഥികൾ പരീക്ഷ എഴുതിയതിൽ എല്ലാവരും വിജയം നേടി. ഏറ്റവും കുറവ് വിദ്യാർഥികളെ പരീക്ഷയ്ക്കിരുത്തിയത് ഫോർട്ട് ഗവ. സംസ്കൃതം എച്ച്എസാണ്.
