മട്ടാഞ്ചേരി: കൊച്ചിയുടെ കടല് തീരം കടലെടുത്തു. കഴിഞ്ഞ 25 വര്ഷത്തിനകം കൊച്ചി തീരദേശത്ത് നഷ്ടപ്പെട്ടത് 200 ഏക്കറോളം ഭൂമി. ഫോര്ട്ടുകൊച്ചി മുതല് ചെല്ലാനം വരെ കടല്കയറ്റം രൂക്ഷമാണ്. ആഗോളതാപനവും അന്തരീക്ഷ ഊഷ്മാവിന്റെ മാറ്റങ്ങളും കടല്ക്കയറ്റത്തിന് കാരണമാകുമ്പോള് കൊച്ചിക്ക് നഷ്ടമാകുന്നത് ചരിത്ര ശേഷിപ്പുകളുമാണ്.
90കളില് കൊച്ചി മുതല് തീരം വഴി ആലപ്പുഴ വരെ നടന്ന് ചെല്ലാമായിരുന്നു. ഈ മേഖലയിലെ 300 ഏക്കറോളം ഭൂമി കടല് കവര്ന്നതോടെ ഒട്ടേറെ ടൂറിസം വികസന സാധ്യതകളും പദ്ധതികളുമാണ് ഇല്ലാതായത്. കൊച്ചി രാജഭരണകാലവും ചൈന, ഡച്ച്, പോര്ച്ചുഗീസ്, ബ്രീട്ടിഷ് ഭരണ ശേഷിപ്പുകളുടെയും കോട്ടകളുടെയും തീരം കൂടിയാണിത്.
തീരത്ത് കണ്ടെത്തിയ ഇമ്മാനുവല് കോട്ടയുടെ തിരുശേഷിപ്പുകള് ഇതിന് തെളിവായും ചൂണ്ടിക്കാട്ടുന്നു. കൊച്ചിയുടെ പുതുവത്സരാഘോഷമായ ബീച്ച് ഫെസ്റ്റിവല് മുതല് കാര്ണിവല് വരെയുള്ള ആഘോഷവേദിയായിരുന്നു കൊച്ചി ബീച്ച്. വിദേശ വിനോദസഞ്ചാരികള്ക്ക് വരെ പ്രിയപ്പെട്ട കടല്തീരമാണ് ഇന്ന് കടല് കവര്ന്നു.
രൂക്ഷമായ കടല്ക്കയറ്റം തീരത്തെ 16 ഓളം ചീനവലകളാണ് ഇല്ലാതാക്കിയത്. അടിയൊഴുക്കിന്റെ ഗതി മാറ്റമാണ് തീരം കവരുന്നതിനിടയാക്കുന്നതെന്നാണ് മത്സ്യമേഖലയിലുള്ളവര് പറയുന്നത്. പുലിമുട്ടുകള്കെട്ടി തീരം സംരക്ഷിക്കണമെന്നാവശ്യമുയര്ന്നെങ്കിലും ബന്ധപ്പെട്ടവര് ഇതിനെ അവഗണിക്കുകയായിരുന്നുവെന്ന് സാമൂഹ്യ സംഘടനകള് ചുണ്ടിക്കാട്ടുന്നു.
