ന്യൂദല്ഹി: ഇന്ത്യയും ചൈനയും തമ്മില് ധാരണയുണ്ടാക്കിയിട്ടും ലഡാക്കിലെ സംഘര്ഷം ഒഴിയുന്നില്ല. ധാരണ പാലിക്കാനും സൈന്യത്തെ പിന്വലിക്കാനും ചൈന തയാറാകുന്നില്ലെന്നു മാത്രമല്ല ചില സ്ഥലങ്ങളില് വീണ്ടും കൈയേറ്റം നടത്തുന്നു. ഈ സാഹചര്യത്തില് ഇന്ത്യ കിഴക്കന് ലഡാക്കില് വ്യോമപ്രതിരോധത്തിനുള്ള മിസൈലുകള് വിന്യസിച്ചു. അതിവേഗം തിരിച്ചടിക്കാന് കഴിയുന്ന തരം ഉപരിതല വ്യോമ മിസൈല് സംവിധാനമാണ് സ്ഥാപിച്ചത്.
അതിര്ത്തിയില് ചൈനീസ് കോപ്ടറുകളുടെയും വിമാനങ്ങളുടെയും പറക്കലുകള് കൂടിയിട്ടുണ്ട്. കരസേനയുടെയും വ്യോമസേനയുടെയും വ്യോമപ്രതിരോധ സംവിധാനങ്ങള് വിന്യസിച്ചു കഴിഞ്ഞു. ചൈനീസ് യുദ്ധ വിമാനങ്ങളോ കോപ്ടറുകളോ ദുസാഹസത്തിനു മുതിര്ന്നാല് തിരിച്ചടിക്കുകയാണ് ലക്ഷ്യം, സൈനിക വൃത്തങ്ങള് അറിയിച്ചു. ആകാശ് മിസൈല് അടക്കമുള്ളവയാണ് വിന്യസിച്ചത്.
അതിര്ത്തി മേഖലകളില് ചൈന യുദ്ധ വിമാനങ്ങളും ബോംബറുകളും വിന്യസിച്ചിട്ടുണ്ട്. യഥാര്ഥ നിയന്ത്രണരേഖയ്ക്ക് വളരെ അടുത്താണ് ചൈനീസ് കോപ്ടറുകള് പറക്കുന്നത്. ദൗലത് ബെയ്ഗ് ഓള്ഡി, ഗല്വാന് താഴ്വരയ്ക്കടുത്ത് പട്രോളിങ് പോയിന്റ് 14, 15, 17, 17എ (ഹോട്ട് സ്പ്രിങ്സ്) പാങ്ഗോങ് സോ തുടങ്ങിയ മേഖലകളിലെല്ലാം അതിര്ത്തിയോട് ചേര്ന്നാണ് ചൈനീസ് സേനയുടെ പ്രവര്ത്തനം. ഇവര് ഫിംഗര് മൂന്നിനടുത്തേക്ക് നീങ്ങുകയാണെന്നും റിപ്പോര്ട്ടുകളുണ്ട്. അതിവേഗം നീങ്ങുന്ന യുദ്ധവിമാനങ്ങളെ നിഷ്പ്രയാസം തകര്ക്കാന് ശേഷിയുള്ളതാണ് ആകാശ് മിസൈല്. കിഴക്കന് ലഡാക്കില് സുഖോയ് അടക്കമുള്ള യുദ്ധ വിമാനങ്ങള് ഇന്ത്യ നേരത്തെ തന്നെ വിന്യസിച്ചിരുന്നു. നിരീക്ഷണവും കുറ്റമറ്റതാക്കി. ഒരു ശത്രു വിമാനവും നമ്മുടെ റഡാറുകളെ വെട്ടിച്ച് പോകില്ലെന്ന് ഉറപ്പാക്കിയിട്ടുണ്ട്.
