മൂലമറ്റം: മരം വീണ് വീട് ഭാഗികമായി തകര്‍ന്നു. ഇന്നലെ പുലര്‍ച്ചെ 1 മണിയ്‌ക്കാണ് അറക്കുളം അശോക കവലയ്‌ക്കു സമീപം ആഡിറ്റ് റോഡിന് സമീപം തൈപ്പറമ്പില്‍ സുധ മധുവിന്റെ വീടിന് മുകളിലേയ്‌ക്ക് അയല്‍വാസിയുടെ സ്ഥലത്തെ മരം ഒടിഞ്ഞുവീണത്.
വീടിന് സമീപത്തെ വൈദ്യുതി ലൈനില്‍ തട്ടിനിന്നതിനാല്‍ വീടിന് കാര്യമായ തകരാറുണ്ടായില്ല. അപകടസമയത്ത് സുധയും മകനും മാത്രമാണ് വീട്ടില്‍ ഉണ്ടായിരുന്നത്. പലതവണ തവണ ഈ മരം വെട്ടിമാറ്റണമെന്ന് ഉടമയോട് പറഞ്ഞിരുന്നതായി സുധ പറയുന്നു. മൂലമറ്റം ഫയര്‍ഫോഴ്സ് എത്തിയാണ് മരം വെട്ടിമാറ്റിയത്. ദുരന്തനിവാരണ നിയമമനുസരിച്ച് അപകട ഭീഷണി ഉയര്‍ത്തുന്ന മരങ്ങള്‍ വെട്ടിമാറ്റാന്‍ സര്‍ക്കാരും ജില്ലാ കളക്ടറും ഉത്തരവിട്ടിരുന്നതാണ്.
എന്നാല്‍ പഞ്ചായത്തോ ബന്ധപ്പെട്ട മറ്റ് അധികാരികളോ നടപടിയെടുക്കാറില്ല. ഇതുപോലെ റോഡരുകില്‍ അപകടാവസ്ഥയില്‍ നില്ക്കുന്ന മരങ്ങള്‍ ഏത് സമയത്തും ഒടിഞ്ഞ് വീഴുന്ന അവസ്ഥയാണ്. മഴക്കാലം ശക്തമാകുന്നതിനു മുന്‍പ് അപകടകരമായ മരങ്ങള്‍ വെട്ടിമാറ്റി അപകടസാധ്യത ഇല്ലാതാക്കണമെന്ന ആവശ്യം ശക്തമാകുന്നു.
പ്രതികരിക്കാൻ ഇവിടെ എഴുതുക: