തിരുവനന്തുപരം: ശാരീരിക അകലം പാലിക്കുന്നത് ഉള്പ്പെടെയുള്ള ആരോഗ്യ സുരക്ഷാ മാനദണ്ഡങ്ങള് കര്ശനമാക്കുന്നതിന് സംസ്ഥാനത്ത് പോലീസ് നടപടികള് ശക്തമാക്കുന്നു. കടകള്, ചന്തകള് മുതലായ സ്ഥലങ്ങളിലും ഇത്തരം സ്ഥാപനങ്ങള്ക്ക് അകത്തും ജനം കൂട്ടം കൂടുന്നത് അനുവദിക്കില്ല. സ്ഥാപനങ്ങള് അണുവിമുക്തമാക്കണം. ഏറ്റവും കുറച്ച് ജീവനക്കാരെ മാത്രമേ നിയോഗിക്കാവൂ. നിര്ദ്ദേശങ്ങള്ക്ക് വിരുദ്ധമായി പ്രവര്ത്തിക്കുന്നവരുടെ ഫോട്ടോയും മറ്റ് വിവരങ്ങളും പോലീസ് ആസ്ഥാനത്തെ കണ്ട്രോള് റൂമിന് അയച്ചു നല്കാന് പൊതുജനങ്ങള് തയ്യാറാകണം.
വിദേശങ്ങളില് നിന്ന് എത്തുന്നവര് വിമാനത്താവളങ്ങളില് നിന്ന് നേരെ വീടുകളിലേക്കാണ് പോകേണ്ടത്. വഴിയില് ബന്ധുവീടുകള് ഉള്പ്പെടെ മറ്റു സ്ഥലങ്ങള് സന്ദര്ശിക്കുന്നത് അനുവദിക്കില്ല. കണ്ടെയ്ന്മെന്റ് മേഖലകളില് ബാരിക്കേഡുകള് സ്ഥാപിച്ച് പോലീസ് സംവിധാനം കൂടുതല് കര്ശനമാക്കും. ഇത്തരം സ്ഥലങ്ങളില് ആര്ക്കും ഒരിളവും അനുവദിക്കില്ല. എല്ലാ മാനദണ്ഡങ്ങളും പാലിച്ച് വാഹനപരിശോധന നടത്തും. അനുവദനീയമായ എണ്ണം ആള്ക്കാരെ മാത്രമേ വാഹനങ്ങളില് യാത്ര ചെയ്യാന് അനുവദിക്കൂ. രാത്രി ഒന്പതു മണിക്ക് ശേഷമുള്ള വാഹനഗതാഗതത്തിന് നിയന്ത്രണമുണ്ടായിരിക്കും. അവശ്യസര്വീസുമായി ബന്ധപ്പെട്ട വാഹനങ്ങള്ക്ക് മാത്രമേ ഇളവ് അനുവദിച്ചിട്ടുള്ളൂ.
