തിരുവനന്തപുരം : സംസ്ഥാനത്ത് ആദ്യമായി ഒരു മന്ത്രി സ്വയം നിരീക്ഷണത്തില്‍. കൃഷി വകുപ്പ് മന്ത്രി വി.എസ് സുനില്‍കുമാറാണ് സ്വയം നിരീക്ഷണത്തില്‍ പോയത്. തിരുവനന്തപുരത്താണ് അദ്ദേഹം ഉള്ളത്. തീരുമാനം തൃശൂരില്‍ മന്ത്രി പങ്കെടുത്ത ഒരു പരിപാടിയില്‍ ആരോഗ്യ പ്രവര്‍ത്തകയായ കോവിഡ് രോഗി എത്തിയതിനാലാണിത്.
സംസ്ഥാനത്ത് ഇന്ന് ഞാറ്റുവേലയചന്തകളുടേയും കര്‍ഷക സഭകളുടേയും സംസ്ഥാന തല ഉദ്ഘാടനം നടക്കാനിരിക്കെയാണ് കൃഷിമന്ത്രി നിരീക്ഷണത്തിലേക്ക് പോയിരിക്കുന്നത്. ഇന്നലെ രാത്രിയാണ് മന്ത്രി സെല്‍ഫ് ക്വാറന്റീനില്‍ പോകാന്‍ തീരുമാനിക്കുന്നത്. തിരുവനന്തപുരത്തെ മന്ത്രി മന്ദിരത്തിലാണ് വിഎസ് സുനില്‍കുമാര്‍ നിരീക്ഷണത്തില്‍ കഴിയുന്നത്.
കഴിഞ്ഞ ദിവസം മന്ത്രിയുടെ അധ്യക്ഷതയില്‍ ചേര്‍ന്ന കൊറോണ പ്രതിരോധ യോഗത്തില്‍ പങ്കെടുത്ത ആരോഗ്യ പ്രവര്ത്തകയ്ക്ക് കൊവിഡ് പോസിറ്റീവ് സ്ഥിരീകരിച്ചിരുന്നു. ഇതിന് പിന്നാലെ മന്ത്രി സ്വയം നിരീക്ഷണത്തില്‍ പോകാന്‍ തീരുമാനിക്കുകയായിരുന്നു.
എന്നാല്‍ നിലവില്‍ ആശങ്കപ്പെടേണ്ട സാഹചര്യമില്ലെന്നും, മുന്‍കരുതല്‍ നടപടിയുടെ ഭാഗമായാണ് താന്‍ നിരീക്ഷണത്തില്‍ പ്രവേശിച്ചതെന്നും മന്ത്രി പറഞ്ഞു. കൊറോണ പ്രവര്‍ത്തനങ്ങളുടെ അവലോക യോഗങ്ങളിലും മറ്റ് മേഖലാ സന്ദര്‍ശനങ്ങളിലും മാസ്‌കും, കയ്യുറയും ധരിച്ച് മാത്രമാണ് എത്തിയതെന്നും അതുകൊണ്ട് ആശങ്കപ്പെടേണ്ട സാഹചര്യമില്ലെന്നും മന്ത്രി കൂട്ടിച്ചേര്‍ത്തു.
ഓണ്‍ലൈനായും ടെലിഫോണിലൂടെയുമെല്ലാം കൊറോണ പ്രവര്‍ത്തനങ്ങള്‍ ഏകോപിപ്പിക്കുമെന്നും നേതൃത്വം നല്‍കുമെന്നും മന്ത്രി വ്യക്തമാക്കി. എറണാകുളം ജില്ലയിലെ പ്രതിരോധ പ്രവര്‍ത്തനങ്ങളുടെ ചാര്‍ജ് മന്ത്രി വി.എസ്. സുനില്‍ കുമാറിനാണ്.
പ്രതികരിക്കാൻ ഇവിടെ എഴുതുക: