കൊടുവള്ളി: കരുവന്‍പൊയിലില്‍ വീട്ടുമുറ്റത്ത് നിര്‍ത്തിയിട്ട രണ്ടു ബൈക്കുകള്‍ വീടിനടുത്തുള്ള പറമ്പില്‍ മതിലില്‍ നിന്ന് താഴേക്ക് തള്ളിയിട്ട് നശിപ്പിക്കപ്പെട്ട നിലയില്‍ കണ്ടെത്തി. മഞ്ചപ്പാറക്കല്‍ മുഹമ്മദിന്റെ വീട്ടിലാണ് ബുധനാഴ്ച അര്‍ദ്ധരാത്രിക്ക് ശേഷം അക്രമം നടന്നത്. മുഹമ്മദിന്റെ ആക്റ്റീവയും മകന്‍ നജ്മുദ്ദീന്റെ പാഷന്‍ പ്രോബൈക്കുമാണ് നശിപ്പിക്കപ്പെട്ടത്.
വര്‍ക്ക്‌ഷോപ്പ് നടത്തി വരുന്ന നജ്മുദ്ദീന്‍ ബുധനാഴ്ച രാത്രി തന്നെ ജോലി കഴിഞ്ഞ് വീട്ടില്‍ എത്തി ബൈക്ക് പോര്‍ച്ചില്‍ നിര്‍ത്തിയിട്ടതായിരുന്നു. പിറ്റേന്ന് രാവിലെ ബൈക്ക് പോര്‍ച്ചില്‍ കണ്ടില്ല തുടര്‍ന്ന് നടത്തിയ അന്വേഷണത്തിലാണ് വീടിനടുത്ത പറമ്പില്‍ മതിലിന് മുകളില്‍ നിന്നും താഴേക്ക് തള്ളിയിടുകയും ബൈക്കിന്‍ മുകളില്‍ വലിയ കരിങ്കല്ല് എട്ടത്തിട്ടതായും കണ്ടെത്തിയത്. മുഹമ്മദിന്റെ ആക്ടീവയുടെ ടയര്‍ അക്രമികള്‍ കുത്തിക്കീറുകയും ചെയ്തു.
കഴിഞ്ഞ ഏപ്രില്‍ മൂന്നിന് കരുവന്‍പൊയില്‍ മഹല്ല് സെക്രട്ടറി ടി.പി ഉസ്സയിന്‍ഹാജിയെ മയക്കുമരുന്ന മാഫിയ സംഘം അക്രമിച്ച് പരിക്കേല്‍പ്പിച്ചിരുന്നു അന്ന് അക്രമിസംഘത്തെ പോലീസെത്തും വരെ തടഞ്ഞുവച്ചവരുടെ കൂട്ടത്തില്‍ മുഹമ്മദും നജ്മുദ്ദീനും ഉണ്ടായിരുന്നു. ഇവരെ പിന്നീട് ഫോണില്‍ അക്രമിസംഘം ഭീഷണിപ്പെടുത്തുകയുണ്ടായി. അത് കൊണ്ടുതന്നെ ബൈക്കുകള്‍ നശിപ്പിച്ചതില്‍ മയക്കുമരുന്ന് മാഫിയക്ക് പങ്കുണ്ടോ എന്ന് പോലീസ് അന്വേഷിച്ചുവരികയാണ്.
പ്രതികരിക്കാൻ ഇവിടെ എഴുതുക: