കൊച്ചി: പ്രളയ ദുരിതാശ്വാസ ഫണ്ട് വെട്ടിച്ച കേസില് എറണാകുളം കളക്ടറേറ്റിലെ സെക്ഷന് ക്ലാര്ക്ക് വിഷ്ണുപ്രസാദിന് ഇന്നലെയും ജാമ്യം ഇല്ല. ജാമ്യാപേക്ഷ മൂവാറ്റുപുഴ വിജിലന്സ് കോടതി ജഡ്ജി ജോബിന് സെബാസ്റ്റന് 22ന് തിങ്കളാഴ്ച പരിഗണിക്കും. ജൂണ് എട്ടിനാണ് എറണാകുളം ക്രൈം ബ്രാഞ്ച് പോലീസ് വിഷ്ണുപ്രസാദിനെ അറസ്റ്റ് ചെയ്തത്. ഏഴു ദിവസം ക്രൈംബ്രാഞ്ച് പോലീസ് കസ്റ്റഡിയില് ചോദ്യം ചെയ്യുവാന് കോടതി പ്രതിയെ വിട്ടുകൊടുത്തിരുന്നു. നേരത്തെ ദുരിതാശ്വാസ നിധിയിലെ വെട്ടിപ്പുമായി ബന്ധപ്പെട്ട്, മറ്റൊരു കേസില് പ്രതി മൂന്നു മാസം ജയിലില് കിടന്നിരുന്നു. തുടര്ന്ന് ജാമ്യത്തിലിറങ്ങിയ പ്രതിയെ പുതിയ എഫ്ഐആര് പ്രകാരം അറസ്റ്റു ചെയ്യുകയായിരുന്നു.
പൊതു സമ്പത്ത് അന്യായമായി കൈവശപ്പെടുത്തി അനധികൃതമായി ധനം സമ്പാദിക്കുവാന് കേരള മുഖ്യമന്ത്രിയുടെ പ്രളയദുരിതാശ്വാസ നിധിയിലെ പണം കൈകാര്യം ചെയ്തിരുന്ന പ്രതി ദുരിതാശ്വാസ നിധിയിലേക്ക് ലഭിച്ച ഉദ്ദേശം ഒന്നേകാല് കോടി രൂപയില് 48 ലക്ഷം രൂപ സിഎംഡിആര്എഫ് അക്കൗണ്ടില് നിക്ഷേപിച്ചു. ബാക്കി 73 ലക്ഷം രൂപ സര്ക്കാരിലേക്ക് അടയ്ക്കാതെ പ്രതി സ്വന്തമാക്കിയെന്നുമാണ് കേസ്.
ഈമാസം 30 വരെയാണ് പ്രതി മൂവാറ്റുപുഴ സബ് ജയിലില് റിമാന്ഡിലാക്കിയിരിക്കുന്നത്. പ്രതിയുടെ ജാമ്യാപേക്ഷയെ പബ്ലിക്ക് പ്രോസിക്യൂട്ടര് എല്. ആര്. രജ്ഞിത് കുമാര് എതിര്ത്തു. പ്രതി അന്വേഷണവുമായി സഹകരിക്കുന്നില്ല. ജാമ്യം നല്കിയാല് പ്രതി തെളിവ് നശിപ്പിക്കും. ഒളിവില് പോകും. കൂടുതല് പ്രതികളുണ്ടോയെന്നും അന്വേഷിക്കാനുണ്ട്. ദുരന്ത സന്ദര്ഭങ്ങളില് സാധാരണ ജനങ്ങള്ക്ക് അടിയന്തര സഹായം നല്കാനുള്ള മുഖ്യമന്ത്രിയുടെ ദുരിതാശ്വാസ നിധി ഒരു സര്ക്കാരുദ്യോഗസ്ഥനായ പ്രതി കൈവശപ്പെടുത്തിയതിനുശേഷം അന്വേഷണവുമായി സഹകരിക്കാതെ അപഹരിക്കപ്പെട്ട തുക കണ്ടെത്തുന്നതിന് തടസം സൃഷ്ടിക്കുന്നത് ഭാവിയില് ഈനിധിയില് സംഭാവന നല്കാനുള്ള പൊതുജനത്തിന്റെ സന്നദ്ധതയെ പ്രതികൂലമായി ബാധിക്കുമെന്നും പ്രോസിക്യൂട്ടര് ചൂണ്ടിക്കാട്ടി.
