പാനൂര്:നിറുത്തിയിട്ട സ്വകാര്യ ബസുകളില് നിന്നും ബാറ്ററി അടിച്ചു മാറ്റുന്ന മോഷ്ടാവിനെ തലശേരി സി.ഐ.സനല്കുമാറും സംഘവും പിടികൂടി.തലശേരി ഗോപാല പേട്ട സ്വദേശി മുണ്ടനിക്കോട്ട് ഫഹദ് (24)നെയാണ് പിടികൂടിയത്. തലശേരി ബസ്റ്റാന്ഡില് നിറുത്തിയിട്ട ബസില് നിന്നും, പാനൂര് പോലീസ് സ്റ്റേഷന് പരിധിയിലെ ചമ്പാട് നിന്നും ബസുകളില് നിന്നും ബാറ്ററി മോഷ്ടിച്ചത് ഫഹദാണ്. ഓട്ടോയിലെത്തിയാണ് മോഷണം.
ചമ്പാട് നിന്ന് അക്ഷയ ബസില് നിന്നും ബാറ്ററി മോഷണം പോയതോടെ പാനൂര് പോലീസും അന്വേഷണത്തിലായിരുന്നു. തലശേരിയിലും സമാനമായ പരാതി ഉയര്ന്നതോടെ ഫഹദ് ഓടിച്ച ഓട്ടോറിക്ഷ കേന്ദ്രീകരിച്ച് നടന്ന അന്വേഷണത്തിലാണ് പ്രതി വലയിലായത്. ഓട്ടോയുടെ പേര് രഹസ്യമായി അറിഞ്ഞതോടെ, കൂത്തുപറമ്പില് നിന്നും രാത്രിയില് സിസിടിവി യില് ഓട്ടോറിക്ഷ പോകുന്നത് പതിഞ്ഞതോടെ പ്രതിയെ പിടികൂടാന് സാധിക്കുകയായിരുന്നു. പ്രതി കുറ്റം സമ്മതിച്ചതായി സി.ഐ.സനല്കുമാര് പറഞ്ഞു.
കോവിഡ് കാലമായതിനാല് വിശദമായി ചോദ്യം ചെയ്യാന് സാധിച്ചിട്ടില്ല. റിമാന്ഡ് ചെയ്ത് പ്രതിയെ കോവിഡ് പരിശോധന നെഗറ്റീവ് ആണെങ്കില് ചോദ്യം ചെയ്യാന് കസ്റ്റഡിയില് വാങ്ങും. സമാനമായ മോഷണങ്ങള് തലശേരി, മാഹി, പിണറായി, കൂത്തുപറമ്പ് ഭാഗങ്ങളില് നടന്നതിനാല് ഇയാളെ ചോദ്യം ചെയ്താല് കൂടുതല് വിവരങ്ങള് അറിയാന് സാധിക്കുമെന്ന് സി.ഐ. അറിയിച്ചു.എസ്.ഐ.രാഗേഷ്, അഡീഷണല് എസ്.ഐ.രാജീവന്, സീനിയര് സിവില് പോലീസ് ഓഫീസറായ സുജേഷ്, സിവില് പോലീസ് ഓഫീസര് ഷിജു എന്നിവര് അടങ്ങിയ പ്രത്യേക സംഘമാണ് പ്രതിയെ പിടികൂടിയത്.
ജന്മഭൂമി ഓണ്ലൈന്