അടിമാലി: കൊന്നത്തടി വെള്ളത്തൂവല്‍ പഞ്ചായത്തുകളെ തമ്മില്‍ ബന്ധിപ്പിക്കുന്ന വിമലാസിറ്റി പാലത്തിലൂടെയുള്ള വാഹനഗതാഗതവും കാല്‍നട യാത്രയും മഴയത്ത് ദുഷ്‌ക്കരമാകുന്നു. വെള്ളത്തൂവല്‍ ടൗണില്‍ നിന്ന് പന്നിയാര്‍കുട്ടിയിലേക്കുള്ള പാതയിലാണ് വിമലാ സിറ്റി പാലം സ്ഥിതി ചെയ്യുന്നത്. കൊന്നത്തടി വെള്ളത്തൂവല്‍ പഞ്ചായത്തുകളെ തമ്മില്‍ ബന്ധിക്കുന്ന പാലത്തിലൂടെ ദിവസവും നൂറ് കണക്കിന് വാഹനങ്ങളും കാല്‍നടയാത്രികരും കടന്നു പോകുന്നു.
എന്നാല്‍ മഴപെയ്യുന്നതോടെ പാലം ചെളിക്കുണ്ടായി തീരുന്നത്് കാല്‍ നടയാത്രികര്‍ക്ക് ചെറിയ ബുദ്ധിമുട്ടല്ല സമ്മാനിക്കുന്നത്. പാലത്തിന്റെ ഇരുഭാഗത്തുമുള്ള റോഡുകളുടെ റീടാറിങ് നടക്കുമെങ്കിലും പാലത്തിന് മുകളില്‍ കൃത്യമായി റീടാറിങ് ജോലികള്‍ നടക്കാതെ വന്നതാണ് വലിയ കുഴികള്‍ രൂപം കൊള്ളാന്‍ കാരണമായതെന്ന് പ്രദേശവാസികള്‍ പറയുന്നു. മഴക്കാലത്തിന് മുമ്പെ തന്നെ വെള്ളം കെട്ടികിടക്കാന്‍ പാകത്തില്‍ നിരവധി കുഴികള്‍ പാലത്തില്‍ രൂപം കൊണ്ടു കഴിഞ്ഞു.
വാഹനങ്ങള്‍ കടന്ന് പോകുമ്പോള്‍ ഈ കുഴികളില്‍ നിന്ന് ചെളിവെള്ളം തെറിക്കുന്നത് കാല്‍നടയാത്രികരുടെ പരാതിക്ക് ഇടവരുത്തുന്നു. കാലവര്‍ഷം കനക്കും മുമ്പെ പാലത്തിലെ കുഴികളടക്കാന്‍ നടപടി സ്വീകരിക്കണമെന്നാണ് വാഹനയാത്രികരുടെയും കാല്‍നടയാത്രികരുടെയും ആവശ്യം.
പ്രതികരിക്കാൻ ഇവിടെ എഴുതുക: