മട്ടാഞ്ചേരി: ലോക്ഡൗണിനെ തുടര്ന്ന് കുടുങ്ങിയ 105 യാത്രക്കാരുമായി ഒരു കപ്പല് കൂടി കൊച്ചി തുറമുഖത്തെത്തി. എംവി കോറല് എന്ന കപ്പലാണ് ഇന്നലെ രാവിലെ തുറമുഖത്തെത്തിയത്. കപ്പലില് 94 പുരുഷന്മാരും പതിനൊന്ന് സ്ത്രീകളുമാണുള്ളത്. പത്ത് വയസില് താഴെയുള്ള അഞ്ച് കുട്ടികളും ഉണ്ടായിരുന്നു. ആരോഗ്യ പരിശോധനയ്ക്ക് ശേഷമാണ് ഇവരെ കപ്പലില് നിന്ന് ഇറക്കിയത്. മലയാളികളായ 26 പേരാണ് കപ്പലിലുള്ളത്.
കേരളത്തില് മെഡിക്കല് ആവശ്യത്തിനും ജോലി സംബന്ധമായും എത്തിയ 33 പേരും ഇന്നലെ എത്തിയ കപ്പലിലുണ്ട്. ഇതര സംസ്ഥാനക്കാരായ 46 പേരും എത്തിയിട്ടുണ്ട്. ആലപ്പുഴ-മൂന്ന്, എറണാകുളം-മൂന്ന്, കണ്ണൂര്-ഒന്ന്, കൊല്ലം-ഒന്ന്, കോട്ടയം-രണ്ട്, കോഴിക്കോട്-നാല്, മലപ്പുറം-നാല്, പാലക്കാട്-രണ്ട് എന്നിങ്ങനെയാണ് കപ്പലിലുണ്ടായ മലയാളികളുടെ ജില്ല തിരിച്ചുള്ള കണക്ക്. ഇവരെല്ലാം ട്രെയിനുകളിലും മറ്റ് വാഹനങ്ങളിലുമായി അതാത് ഇടങ്ങളിലേക്ക് പോയി. ഇവര്ക്കെല്ലാം ഗൃഹനിരീക്ഷണമാണ് നിര്ദേശിച്ചിരിക്കുന്നത്.
