ദുബായ്: കൊച്ചിയില് നിന്ന് കുവൈറ്റിലെത്തിയ മൂന്ന് മലയാളി നഴ്സുമാര്ക്ക് കൊവിഡ് സ്ഥിരീകരിച്ചു. അവധിക്കുശേഷം പ്രത്യേക വിമാനത്തില് തിരിച്ചുപോയവര്ക്കാണ് രോഗം. കൊച്ചിയില് പരിശോധനയ്ക്ക് ശേഷമാണ് ഇവരെ കൊണ്ടുപോയത്. ഇവര്ക്കൊപ്പം എത്തിയ എല്ലാവരെയും നിരീക്ഷണത്തിലാക്കി.
രോഗം സ്ഥിരീകരിച്ചവരിൽ ഒരാള് തിരുവല്ല മാന്നാര് വളഞ്ഞ വട്ടം സ്വദേശിയാണ്. അദാന് ആശുപത്രിയിലെ സ്റ്റാഫ് നഴ്സ് ആണ് ഇദ്ദേഹം. മറ്റു രണ്ടു പേരില് ഒരാള് സ്ത്രീയാണ്. ഇവര് രണ്ടു പേരും സബാഹ് ആശുപത്രിയിലെ സ്റ്റാഫ് നഴ്സുമാരാണ്. എന്നാല്, ഇവര് ഏത് ജില്ലയില് നിന്നുള്ളവരാണെന്ന് വ്യക്തമല്ല. രോഗ ബാധ സ്ഥിരീകരിക്കപ്പെട്ട മൂന്നു പേരെയും ഇപ്പോള് ജാബിര് ആശുപത്രിയിലേക്ക് മാറ്റി. ജാബര് അല് അഹമദ് പ്രദേശത്തെ ഒരു കെട്ടിടത്തില് ക്വാറന്റൈന് ഏര്പ്പെടുത്തിയിരിക്കുകയാണ് ബാക്കി മുഴുവന് യാത്രക്കാരെയും.
വിമാന സര്വ്വീസ് നിര്ത്തലാക്കിയത് കാരണം അവധി കഴിഞ്ഞ് തിരിച്ചു വരാന് കഴിയാതെ ഇന്ത്യയില് കുടുങ്ങി കിടക്കുന്ന ആരോഗ്യ പ്രവര്ത്തകര്ക്ക് തിരിച്ചു വരുന്നതിനു കഴിഞ്ഞ ദിവസമാണ് കുവൈത്ത് സര്ക്കാര് സൗകര്യം ഏര്പ്പെടുത്തിയത്. ഇതിന്റെ ഭാഗമായി കുവൈത്തില് നിന്നുള്ള യാത്രക്കാരുമായി നാട്ടിലേക്ക് ചാര്ട്ട് ചെയ്തു പോയ കുവൈത്ത് എയര് വെയ്സ് വിമാനത്തില് ആരോഗ്യ പ്രവര്ത്തകരെ തിരിച്ചു കൊണ്ടു വരാന് തീരുമാനിക്കുകയായിരുന്നു.
