കോഴിക്കോട്/കൊച്ചി: കേരള ബ്ലാസ്റ്റേഴ്സ് ഹോം ഗ്രൗണ്ട് കൊച്ചിയില് തന്നെ തുടരും. കേരള ബ്ലാസ്റ്റേഴ്സ് ഫുട്ബോള് ക്ലബ്ബിന്റെ ഹോം ഗ്രൗണ്ട് കൊച്ചിയില് നിന്നും കോഴിക്കോട്ടേക്ക് മാറുന്നതായി മാധ്യമങ്ങളില് വാര്ത്തകള് വന്നിരുന്നു. എന്നാല് ക്ലബ്ബിന്റെ ഹോം ഗ്രൗണ്ട് പൂര്ണമായും കോഴിക്കോട്ടേക്ക് മാറുന്നില്ലെന്നും, കൊച്ചിയില് തന്നെ തുടരുമെന്നും ക്ലബ്ബ് സ്ഥിരീകരിച്ചു.
കേരള ബ്ലാസ്റ്റേഴ്സ് എഫ്സി എപ്പോഴും ആരാധകരോട് വളരെയധികം ചേര്ന്ന് നില്ക്കാന് ആഗ്രഹിക്കുന്നു.അതുകൊണ്ടുതന്നെ കേരളമാകമാനമുള്ള ആരാധകര്ക്ക് ബ്ലാസ്റ്റേഴ്സിന്റെ മത്സരങ്ങള് വീക്ഷിക്കുന്നതിനുള്ള അവസരങ്ങള് സൃഷ്ടിക്കും . അതിനായി സംസ്ഥാനത്തെ സൗകര്യങ്ങളുള്ള മൈതാനങ്ങള് കണ്ടെത്താനും, അവയെ ലോകോത്തര നിലവാരത്തിലേക്ക് ഉയര്ത്താനുമുള്ള പരിശ്രമങ്ങള് തുടരുമെന്ന് ക്ലബ്ബ് അറിയിച്ചു.
കൂടാതെ കേരളത്തില് വളര്ന്നുവരുന്ന കളിക്കാരെ പ്രൊഫഷണല് ഫുട്ബോളര്മാരായി വളര്ത്തിയെടുക്കാന് ബ്ലാസ്റ്റേഴ്സ് പരിശ്രമിക്കും. ബ്ലാസ്റ്റേഴ്സ് എഫ്സി, ഒരു പ്രത്യേക പ്രദേശത്തിന്റെ പേരില് മാത്രമല്ല കേരളത്തിന്റെ ക്ലബ്ബായി അറിയപ്പെടാനാണ് ആഗ്രഹിക്കുന്നത് എന്നും ക്ലബ്ബ് വ്യക്തമാക്കി.
ജന്മഭൂമി ഓണ്ലൈന്