ആയൂര്‍: അമ്മയും മക്കളും മാത്രം താമസിക്കുന്ന വീട്ടില്‍ കയറി മോഷണശ്രമവും കുട്ടികള്‍ക്ക് നേരെ വധശ്രമവും. സംഭവമറിഞ്ഞ് സ്ഥലത്തെത്തിയ പോലീസ് പ്രതിയെ കസ്റ്റഡിയിലെടുത്തെങ്കിലും കേസെടുക്കാതെ വിട്ടയച്ചു.
ശനിയാഴ്ച രാത്രി 8ന് കാരാളികോണം കുഴിവിള ബംഗ്ലാവില്‍ പരേതനായ നൗഷാദിന്റെ വീട്ടിലാണ് സംഭവം. നൗഷാദിന്റെ ഭാര്യയും കുട്ടികളും മാത്രമാണ് ഇവിടെ താമസം. നൗഷാദിന്റെ മകന്‍ മുഹമ്മദ് നിസ്‌കരിക്കുന്നതിനായി തയ്യാറാകുമ്പോഴാണ് പത്തടിയോളം ഉയരമുള്ള മതില്‍ ചാടി അകത്ത് കടന്ന മോഷ്ടാവിനെ കണ്ടത്. ഭയന്ന് കുളിമുറിയിലേക്ക് ഓടിക്കയറിയ മുഹമ്മദ് നിലവിളിച്ചു. കുളിമുറിയുടെ വാതില്‍ ചവിട്ടിപ്പൊളിച്ച് അകത്ത് കടന്ന് മോഷ്ടാവ് കത്തികാട്ടി കൊല്ലുമെന്ന് ഭീഷണിപ്പെടുത്തി. ശബ്ദം കേട്ട് വീട്ടിലെ ജനാല തുറന്ന് പുറത്തേക്ക് നോക്കിയ നൗഷാദിന്റെ പെണ്‍കുട്ടികളെയും നിലവിളിച്ചാല്‍ കൊല്ലുമെന്ന് ഭീഷണിപ്പെടുത്തി.
നിലവിളി കേട്ട് നാട്ടുകാര്‍ ഓടിക്കൂടിയതോടെ പൈപ്പിലൂടെ കയറി രക്ഷപ്പെടാന്‍ ശ്രമിച്ച മോഷ്ടാവ് പൈപ്പൊടിഞ്ഞ് വീട്ടുമുറ്റത്തെ കിണറ്റിലേക്ക് വീണു. പെണ്‍കുട്ടികളുടേതടക്കം കൂട്ടനിലവിളി കേട്ട് ഓടിയെത്തിയ പരിസരവാസികളും നാട്ടുകാരും ചേര്‍ന്നാണ് മോഷ്ടാവിനെ കിണറ്റില്‍ നിന്നും പുറത്തെത്തിച്ചത്.
ഉടന്‍ തന്നെ ചടയമംഗലം പോലീസില്‍ വിവരം അറിയിച്ചു. ആദ്യം മൂന്ന് പോലീസുകാര്‍ എത്തിയെങ്കിലും പ്രതിയെ കൊണ്ടുപോകാന്‍ തയ്യാറായില്ല. നൗഷാദിന്റെ ബന്ധുക്കള്‍ പിന്നീട് ഉയര്‍ന്ന പോലീസ് ഉദ്യോഗസ്ഥരെ ബന്ധപ്പെട്ട ശേഷമാണ് എസ്ഐ സ്ഥലത്തെത്തി പ്രതിയെ കസ്റ്റഡിയിലെടുത്ത് സ്റ്റേഷനിലേക്ക് കൊണ്ടുപോയത്. മോഷ്ടാവിനെ വൈദ്യപരിശോധനയ്‌ക്ക് കൊണ്ടുപോയ ശേഷം തിരികെ സ്റ്റേഷനിലെത്തിച്ച് വിട്ടയച്ചു.
കേസെടുക്കാതെ മോഷ്ടാവിനെ വിട്ടയച്ച പോലീസ് മോഷണം നടന്ന വീട്ടുകാരോട് എന്താണ് നടന്നതെന്ന് പോലും അന്വേഷിച്ചില്ല. എന്നാല്‍ നാട്ടുകാര്‍ മര്‍ദ്ദിച്ചുവെന്ന പരാതി മോഷ്ടാവില്‍ നിന്ന് പോലീസ് എഴുതി വാങ്ങി. കേസെടുക്കാതെ മോഷ്ടാവിനെ സംരക്ഷിക്കുന്ന ചടയമംഗലം പോലീസിന്റെ നിലപാടിനെതിരെ എസ്പിക്കും ഡിജിപിക്കും വനിത കമ്മീഷനും പരാതി നല്കുമെന്ന് നൗഷാദിന്റെ ബന്ധുക്കള്‍ പറഞ്ഞു.
പ്രതികരിക്കാൻ ഇവിടെ എഴുതുക: