മുക്കം: കൂടരഞ്ഞി ഗ്രാമപഞ്ചായത്തിലെ ഉറുമി ജലവൈദ്യുത പദ്ധതിക്ക് സമീപം പുഴയില് കുളിക്കാനിറങ്ങിയ യുവാവിനെ ഒഴിക്കില് പെട്ട് കാണതായി. മുക്കം നഗരസഭയിലെ പൂളപ്പൊയില് സ്വദേശിയായ പാലാട്ടുപറമ്പില് ഹാനി റഹ്മാനെ (17) ആണ് കാണാതായത്. ശനിയാഴ്ച ഉച്ചകഴിഞ്ഞ് മൂന്ന് മണിയോടെയായിരുന്നു സംഭവം.
രണ്ട് ബൈക്കുകളിലായി നാലംഗ സംഘമാണ് ഉറുമി ജലവൈദ്യുത പദ്ധതി പ്രദേശത്തിന് സമീപം കുളിക്കാനെത്തിയത്. ഇവര് കുളിച്ച് കൊണ്ടിരിക്കുമ്പോള് ശക്തമായ മലവെള്ളപ്പാച്ചില് ഉണ്ടാവുകയായിരുന്നു. നാല് പേരും പെട്ടെന്ന് ഓടി രക്ഷപ്പെടാന് ശ്രമിച്ചങ്കിലും ഹാനീ റഹ്മാന്റെ ചെരിപ്പ് പാറക്കൂട്ടത്തില് ഉടക്കിയതിനാല് ഒഴുക്കില്പെടുകയായിരുന്നു. ഉടന് തന്നെ നാട്ടുകാരും തുടര്ന്ന് തിരുവമ്പാടി പോലീസ്, മുക്കം ഫയര്ഫോഴ്സ് എന്നിവരും തിരച്ചില് നടത്തിയെങ്കിലും ശക്തമായ മലവെള്ളപ്പാച്ചില് തിരിച്ചടിയായി.
നിരവധി തവണ തിരച്ചില് നിര്ത്തിവെക്കേണ്ടതായും വന്നു. നേരത്തെ നിരവധി പേര് ഇവിടെ മലവെള്ളപ്പാച്ചിലില് കുടുങ്ങുകയും 10 ഓളം പേര് മരിക്കുകയും ചെയ്തിട്ടുണ്ട്. പലപ്പോഴും നാട്ടുകാരുടെ എതിര്പ്പുകളും മുന്നറിയിപ്പുകളും മറികടന്ന് പോവുന്നവരാണ് ഇത്തരത്തില് അപകടത്തില് പെടാറുള്ളത്.
