പോത്തന്‍കോട്: തോന്നയ്ക്കല് ഗവ. ഹൈസ്‌കൂളിലെ 1990 ലെ എസ്എസ്എല്‍സി ബാച്ച് പൂര്‍വവിദ്യാര്‍ഥി കൂട്ടായ്മയായ ‘ഓര്‍മകളിലെ തിരുമുറ്റം’ കൊറോണ കാലഘട്ടത്തില്‍ നടത്തിയത് മാതൃകാപരമായ പ്രവര്‍ത്തനം. കൂട്ടായ്മയുടെ ഭാഗമായി പായ്ച്ചിറയില്‍ പ്രവര്‍ത്തിക്കുന്ന വയോജന പരിപാലന കേന്ദ്രത്തിന് ഒരു മാസത്തേക്ക് ആവശ്യമായ ഭക്ഷണം പാചകം ചെയ്യാനുള്ള സാധനങ്ങള്‍, മാസ്‌ക്, സാനിറ്റൈസര്‍ എന്നിവ കൈമാറി.
കൂടെ പഠിച്ച കൂട്ടുകാര്‍ കൊറോണ കാലഘട്ടത്തില്‍ ബുദ്ധിമുട്ടുന്നതറിഞ്ഞ് സുഹൃത്തുക്കള്‍ അവശ്യമായ വീട്ടുസാധനങ്ങള്‍ മാസ്‌ക്, സാനിറ്റൈസര്‍ എന്നിവ നല്‍കി. കേരളത്തിന്റെ വിവിധ സ്ഥലങ്ങളില്‍ ജോലിക്കു പോയി അവിടെ അകപ്പെട്ടുപോയ സഹപാഠികള്‍ക്ക് സന്നദ്ധ സംഘടനകളുമായി ചേര്‍ന്ന് സഹായങ്ങള്‍ എത്തിച്ചു.
കേരളത്തിനു പുറത്ത് അകപ്പെട്ടുപോയ കുട്ടികളെ കൂട്ടായ്മയുടെ പേരില്‍ നാട്ടിലെത്തിക്കുവാനും കഴിഞ്ഞു. എം.എ. ഉറൂബ്, ഡി.കെ. ബിജി, രാജശേഖരന്‍ നായര്‍, ഷിബു, നൗഷാദ്, കബീര്‍, ഷാഹിന എന്നിവരാണ് പ്രവര്‍ത്തനങ്ങള്‍ക്ക് നേതൃത്വം കൊടുക്കുന്നത്.
പ്രതികരിക്കാൻ ഇവിടെ എഴുതുക: