വെള്ളനാട്: തമിഴ്‌നാട്ടില്‍ നിന്നും കേരളത്തിലേക്ക് കടത്തിക്കൊണ്ടുവന്ന വിദേശ മദ്യം ആര്യനാട് എക്‌സൈസ് പിടികൂടി. സിപിഎം നേതാവടക്കം അഞ്ചുപേര്‍ക്കെതിരേ കേസെടുത്തു. വെള്ളനാട് ചാങ്ങ സ്വദേശി രാജേന്ദ്രന്‍ (48), കിച്ചു (23), വിനോദ് (39), ഷൈജു (39), അനില്‍കുമാര്‍ (44) എന്നിവര്‍ക്കെതിരെയാണ കേസെടുത്തത്.
ഇതില്‍ ഷൈജു വെള്ളനാട്ടെ പ്രമുഖ സിപിഎം നേതാവും വെള്ളനാട് സര്‍വീസ് സഹകരണ സംഘം ബോര്‍ഡംഗവും കൂടിയാണ്. ഷൈജുവിന്റെ നേതൃത്വത്തില്‍ വെള്ളനാാട് വ്യാപകമായി മദ്യം മറിച്ചു വില്‍ക്കുന്ന പ്രവര്‍ത്തനത്തെ കുറിച്ച് പരാതി ലഭിച്ചതിന്റെ അടിസ്ഥാനത്തില്‍ ഇന്നലെ രാവിലെ ആര്യനാട് എക്‌സൈസ് കാട്ടാക്കട പബ്ലിക് മാര്‍ക്കറ്റിന് സമീപം നടത്തിയ വാഹന പരിശോധനയിലാണ് സംഘം പിടിയിലായത്.
അസിസ്റ്റന്റ് എക്‌സൈസ് ഇന്‍സ്‌പെക്ടര്‍ ജി. പോള്‍സന്‍, പ്രിവന്റീവ് ഓഫീസര്‍ മോനിരാജേഷ്, സിവില്‍ എക്‌സൈസ് ഓഫീസര്‍മാരായ വി. ഗൗതമന്‍, കെ.എസ്. ഷിന്‍രാജ്, സുജിത്ത്, നിധിന്‍, എസ്. ജുനൈദാബീവി തുടങ്ങിയവര്‍ റെയ്ഡില്‍ പങ്കെടുത്തു. പ്രതികള്‍ തമിഴ്‌നാട്ടില്‍ പോയി വന്നതിനാല്‍ ഇവര്‍ക്കെതിരേ നെടുമങ്ങാട് തഹസില്‍ദാര്‍ക്ക് റിപ്പോര്‍ട്ട് നല്‍കി പ്രതികളെ ഹോം ക്വാറന്റൈനിലാക്കി.
പ്രതികരിക്കാൻ ഇവിടെ എഴുതുക: