തൊടുപുഴ: കഞ്ചാവ് കൈവശം വെച്ച കുറ്റത്തിന് പ്രതിക്ക് അഞ്ച് വര്ഷം കഠിന തടവും 50000 രൂപ പിഴയും. എരുമേലി മണിപ്പുഴ വട്ടംകുഴി മറ്റത്തില് ജോയ്(58) എന്നയാളെയാണ് തൊടുപുഴ എന്ഡിപിസ് കോടതി ജഡ്ജി ശിക്ഷിച്ചത്. പിഴ അടച്ചില്ലെങ്കില് ആറ് മാസം കൂടി കഠിന തടവിനും ശിക്ഷ വിധിച്ചു.
കാഞ്ഞിരപ്പള്ളി പോലീസ് സബ് ഇന്സ്പക്ടര് ആയിരുന്ന അന്സല് എ.എസും സംഘവും ചേര്ന്ന് കൂവപ്പള്ളി അമല ജ്യോതി എഞ്ചിനീയറിംഗ് കോളജിന് സമീപമുള്ള വെയിറ്റിങ് ഷെഡില് നിന്ന് പ്രതിയില് നിന്ന് 1.040 കി.ഗ്രാം കഞ്ചാവ് കണ്ടുപിടിച്ച കേസിലാണ് വിധി.
പ്രതിക്കെതിരെ കാഞ്ഞിരപ്പള്ളി പോലീസ് സര്ക്കിള് ഇന്സ്പെക്ടര് ഷാജു ജോസ് അന്വേഷണം നടത്തി കുറ്റപത്രം നല്കി. കേസില് തൊടുപുഴ സ്പെഷ്യല് കോര്ട്ട് പബ്ലിക് പ്രോസിക്യൂട്ടര് അഡ്വ. ബി. രാജേഷ് ഹാജരായി കേസ് നടത്തി.
