പേരാമ്പ്ര: ചക്കിട്ടപാറ ചെമ്പനോടയില് അജ്ഞാത ജീവിയുടെ ആക്രമണത്തില് തേരകത്ത് ചാക്കോയുടെ മൂന്ന് ആടുകള് ചത്തു. ഒരെണ്ണം കഴുത്തിന് കടിയേറ്റ് ഗുരുതരാവസ്ഥയിലാണ്. കഴിഞ്ഞ ദിവസം രാത്രി ഒരു മണിയോടെയാണ് സംഭവം.
ആടുകളെല്ലാം കൂടിനകത്തായിരുന്നു. ആടുകളുടെ കരച്ചില് കേട്ട് വീട്ടുകാര് ഉണര്ന്ന് നോക്കിയപ്പോഴാണ് സംഭവമറിയുന്നത്. ഇതോടെ പ്രദേശത്ത് കടുവ ഇറങ്ങിയതായി അഭ്യൂഹം പരന്നു. കഴിഞ്ഞ വര്ഷം ഈ മേഖലയില് കടുവ ഇറങ്ങിയിരുന്നു.
ആടുകളെ അക്രമിച്ചത് ഏത് ജീവിയാണെന്ന് സ്ഥിരീകരിച്ചിട്ടില്ല. സമീപത്ത് വന്യമൃഗത്തിന്റെതെന്ന് സംശയിക്കപ്പെടുന്ന കാല്പാടുകള് കണ്ടെത്തിയിട്ടുണ്ടെങ്കിലും ഏത് ജീവിയുടേതാണെന്ന് വ്യക്തമല്ല. വനം വകുപ്പ് അധികൃതരും പോലീസും സ്ഥലത്തെത്തി പരിശോധന നടത്തി.
