കുവൈറ്റ് സിറ്റി: കുവൈറ്റില്‍ ഇന്ന് മൂന്ന് മലയാളികള്‍ കൂടി മരിച്ചു. കൊറോണ കാരണം രണ്ടുപേരും മറ്റൊരാള്‍ ഹൃദയാഘാതത്തിലുമാണ് മരിച്ചത്. പത്തനംതിട്ട വല്ലന സ്വദേശി പവിത്രന്‍ ദാമോദരന്‍ ഇന്നലെ രാത്രിയാണ് മരണമടഞ്ഞത്. 52 വയസുകാരനായ ഇദ്ദേഹം കൊറോണ ബാധയെ തുടര്‍ന്ന് ഫര്‍വ്വാനിയ ആശുപത്രിയില്‍ ചികില്‍സയിലായിരുന്നു. കണ്ണൂര്‍ കതിരൂര്‍ തോട മുക്ക് സ്വദേശി ബൈത്തുല്‍ ഖൈറില്‍ മൂപ്പന്‍ മമ്മൂട്ടി (69) യാണ് മരിച്ച രണ്ടാമത്തെ മലയാളി. നെഞ്ചു വേദന അനുഭവപ്പെട്ടതിനെ തുടര്‍ന്ന് നാലു ദിവസം മുമ്പ് ഫര്‍വ്വാനിയ ആശുപത്രിയില്‍ പ്രവേശിപ്പിച്ച ഇദ്ദേഹത്തിനു പരിശോധനയില്‍ കൊറോണ ബാധയേറ്റതായി കണ്ടെത്തിയിരുന്നു.
കാസര്‍ഗോഡ് തൃക്കരിപ്പൂര്‍ ചെറുവത്തൂര്‍ തുരുത്തി സ്വദേശി തൈലകണ്ടി പുരയില്‍ റാഷിദ് മരിച്ചത് ഹൃദയാഘാതം മൂലമാണ്. 40 വയസായിരുന്നു. അതേസമയം, കുവൈറ്റില്‍ 165 ഇന്ത്യക്കാര്‍ ഉള്‍പ്പെടെ 851 പേര്‍ക്ക് പുതുതായി കൊറോണ സ്ഥിരീകരിച്ചു. 1230 പേര്‍ വൈറസ് രോഗമുക്തി നേടിയതോടെ രോഗമുക്തരായവരുടെ ആകെ എണ്ണം 11,386 ആയി. ഒരു ദിവസം ഇത്രയധികം പേര്‍ രോഗമുക്തി നേടുന്നത് ആദ്യമായാണ്. ഇതുവരെ 27,043 പേര്‍ക്കാണ് കോവിഡ് ബാധിച്ചത്. 15,445 പേരാണ് ചികിത്സയില്‍ കഴിയുന്നത്.
പ്രതികരിക്കാൻ ഇവിടെ എഴുതുക: