കൊച്ചി: ഇന്നലെ രണ്ട് പുതിയ പോസിറ്റീവ് കേസുകള് കൂടി ജില്ലയില് സ്ഥിരീകരിച്ചു. മെയ് 18ന് അബുദാബി-കൊച്ചി വിമാനത്തില് എത്തിയ തൃക്കാക്കര സ്വദേശിനിയായ 34 കാരിക്കും മെയ് 22ന് ന്യൂദല്ഹിയില് നിന്നുള്ള ട്രെയിനില് കൊച്ചിയിലെത്തിയ 26 കാരനുമാണ് രോഗം സ്ഥിരീകരിച്ചത്.
ഇരുവരെയും കളമശേരി മെഡിക്കല് കോളേജില് പ്രവേശിപ്പിച്ചു. ഇതുവരെ വൈറസ് ബാധ സ്ഥിരീകരിച്ച് 18 പേരാണ് ആശുപത്രികളില് ചികിത്സയില് കഴിയുന്നത്. എറണാകുളം ജില്ലയില്നിന്നുള്ള 10 പേരും പാലക്കാട് – 1, കൊല്ലം-1, തൃശൂര് – 1, ഉത്തര്പ്രദേശ്- 1 , ലക്ഷദ്വീപ് – 1, മധ്യപ്രദേശ്- 1, ബംഗാള്- 1, രാജസ്ഥാന്- 1 എന്നിങ്ങനെയാണ് ചികിത്സയില് കഴിയുന്നവരുടെയെണ്ണം.
ഇന്നലെ 608 പേരെ കൂടി വീടുകളില് നിരീക്ഷണത്തിലാക്കി. നിരീക്ഷണ കാലയളവ് അവസാനിച്ച 213 പേരെ നിരീക്ഷണ പട്ടികയില് നിന്ന് ഒഴിവാക്കി. ജില്ലയില് ആകെ 7,834 പേരാണ് നിരീക്ഷണത്തിലുള്ളത്. 150 പേര് ഹൈ റിസ്ക് വിഭാഗത്തിലും 7684 പേര് ലോ റിസ്ക് വിഭാഗത്തിലുമാണ്.
ഇന്നലെ ഒമ്പതുപേരെ പുതുതായി ആശുപത്രിയില് നിരീക്ഷണത്തിനായി പ്രവേശിപ്പിച്ചു. കളമശേരി മെഡിക്കല് കോളേജ്- 1, മൂവാറ്റുപുഴ ജനറല് ആശുപത്രി -4, കരുവേലിപ്പടി താലൂക്ക് ആശുപത്രി-1, ആലുവ ജില്ലാ ആശുപത്രി -1, സ്വകാര്യ ആശുപത്രികള് – 2. ആശുപത്രികളില് നിരീക്ഷണത്തില് കഴിഞ്ഞിരുന്ന എട്ട് പേരെ ഡിസ്ചാര്ജ് ചെയ്തു. വിവിധ ആശുപത്രികളിലായി 63 പേര് നിരീക്ഷണത്തിലുണ്ട്. ഇന്നലെ 80 സാമ്പിളുകള് പരിശോധനയ്ക്ക് അയച്ചു.
