ദുബായ്: പിറന്നാള്‍ ദിനത്തില്‍ മുഖ്യമന്ത്രി പിണറായി വിജയനു കുരുക്കായി വീണ്ടും ലാവലിന്‍ വിവാദം. ഇടപാടില്‍ ഇടനിലക്കാരനായിരുന്നു ദിലീപ് രാഹുലനുമായി പിണറായിക്ക് അടുത്ത ബന്ധമാണ് ഉള്ളതെന്ന് ദിലീപിന്റെ തന്നെ കമ്പനിയുടെ മുന്‍ ചീഫ് ഫിനാന്‍ഷ്യല്‍ ഓഫിസര്‍ ശ്രീനിവാസന്‍ നരംസിഹന്‍ പറഞ്ഞു. മാധ്യമപ്രവര്‍ത്തകരുമായി ഓണ്‍ലൈനായി ദുബായിലെ മാധ്യമപ്രവര്‍ത്തകരുമായി നടത്തിയ വാര്‍ത്താസമ്മേളനത്തിലാണ് ശ്രീനിവാസന്റെ ആരോപണം. പിണറായിയുടെ മകന് ലണ്ടനില്‍ എല്ലാ സൗകര്യങ്ങളും ഒരുക്കി കൊടുത്തത് ദിലീപാണെന്നും ഇതിന് വ്യക്തമായ തെളിവ് ഉണ്ടെന്നും അദ്ദേഹം ആരോപിച്ചു. ദിലീപ് രാഹുലന് പിടിക്കപ്പെട്ടാല്‍ പലരും കുടുങ്ങും.
ദിലീപ് രാഹുലന്റെ പസഫിക് കണ്‍ട്രോള്‍ സിസ്റ്റംസ് എന്ന കമ്പനിയില്‍, മാനേജരായും പിന്നീട്, ചീഫ് ഫിനാന്‍ഷ്യല്‍ ഓഫീസറായും ശ്രീനിവാസന്‍ ജോലി ചെയ്തിരുന്നു. 2016 വര്‍ഷത്തില്‍ ദിലീപ് രാഹുല്‍ വിവിധ ബാങ്കുകളില്‍ നിന്ന് വായ്പ എടുത്ത് മുങ്ങിയെന്നാണ് കേസ്. ഇപ്രകാരം, ഈജ്പിറ്റ് കേന്ദ്രമായ ഒരു ബാങ്കിന്റെ വിധി യുഎഇയില്‍ വരാനിരിക്കെയാണ് ഇപ്പോഴത്തെ പുതിയ വിവാദം. ദിലീപ് രാഹുലന് എതിരെ ഇപ്രകാരം 37 മില്യണ്‍ ദിര്‍ഹത്തിന്റെ ( ഏകദേശം 74 കോടി രൂപ ) ബാങ്ക് തട്ടിപ്പ് കേസിലാണ് ഈ വിധി യുഎഇയില്‍ വരാനിരിക്കുന്നത്.
താന്‍ കഴിഞ്ഞ ദിവസം ദുബായില്‍ അറസ്റ്റിലായി എന്ന ചില മാധ്യമങ്ങളിലെ വാര്‍ത്ത തെറ്റാണെന്നും ശ്രീനിവാസന്‍ വ്യക്തമാക്കി. ചില എജന്‍സികളാണ് ഇത്തരം വാര്‍ത്തകള്‍ക്കു പിന്നില്‍. മലയാളി വ്യവസായി ദിലീപ് രാഹുലന്റെ കമ്പനിയില്‍ നിന്ന് 760 കോടിയോളം രൂപ കാണാതായ കേസില്‍ പിടിയിലായ കമ്പനി മനേജര്‍ ശ്രീനിവാസന്‍ നരസിംഹന്‍, കോടികളുടെ നിക്ഷേപം ഇന്ത്യയിലും നടത്തിയതായി വിവരം ലഭിച്ചുവെന്നായിരുന്നു ചില മാധ്യമങ്ങളിലെ വാര്‍ത്ത. എന്നാല്‍ എവിടെ നിന്നാണ് അത്തരം വിവരം ലഭിച്ചതെന്ന് ശ്രീനിവാസന്‍. അതിനുള്ള തെളിവ് ഹാജരാക്കണമെന്നും മാധ്യമങ്ങളോട് അഭ്യര്‍ഥിച്ചു. ഭാര്യയും മക്കളും ഈ ആരോപണത്തോടെ മാനസികമായി തളര്‍ന്നു. ഇതേ തുടര്‍ന്നാണ്, താന്‍ അറസ്റ്റിലായിട്ടില്ലെന്നും പാസ്പോര്‍ട്ട് സഹിതം വാര്‍ത്താസമ്മേളനത്തില്‍ ഹാരജരാക്കിയത്.
പ്രതികരിക്കാൻ ഇവിടെ എഴുതുക: