തിരുവനന്തപുരം: ഹയര്‍ സെക്കണ്ടറി, എസ്.എസ്.എല്‍.സി പരീക്ഷകള്‍ക്ക് ശേഷം ജൂണ്‍ ആദ്യവാരം സര്‍വകലാശാലാപരീക്ഷകള്‍ നടത്താന്‍ ഉന്നതവിദ്യാഭ്യാസ മന്ത്രി ഡോ. കെ. ടി. ജലീലിന്റെ അദ്ധ്യക്ഷതയില്‍ വൈസ് ചാന്‍സലര്‍മാരുമായി നടത്തിയ വീഡിയോ കോണ്‍ഫറന്‍സില്‍ ധാരണയായി.ആരോഗ്യവകുപ്പിന്റെ നിര്‍ദ്ദേശങ്ങള്‍ കര്‍ശനമായി പാലിച്ചുകൊണ്ടായിരിക്കും പരീക്ഷകള്‍ നടത്തുക. അവസാനവര്‍ഷ പരീക്ഷകള്‍ക്ക് മുന്‍ഗണന നല്‍കും.
ഓരോ സര്‍വകലാശാലയും സ്ഥിതി ചെയ്യുന്ന പ്രദേശത്തിന്റെ പ്രത്യേകതകള്‍ കണക്കിലെടുത്തായിരിക്കും പരീക്ഷാതീയതികള്‍ തീരുമാനിക്കുക. വിദ്യാര്‍ത്ഥികള്‍ക്ക് സൗകര്യപ്രദമായ പരീക്ഷാകേന്ദ്രങ്ങള്‍ തെരഞ്ഞെടുക്കാന്‍ അവസരമുണ്ടാവും. സര്‍വകലാശാലയുടെ പരിധിക്ക് പുറത്തുള്ള ജില്ലകളിലെ വിദ്യാര്‍ത്ഥികള്‍ക്ക് അതത് ജില്ലകളില്‍ പരീക്ഷാകേന്ദ്രങ്ങള്‍ അനുവദിക്കും. അടുത്ത അദ്ധ്യയനവര്‍ഷം ക്ലാസുകള്‍ ജൂണ്‍മാസത്തില്‍ത്തന്നെ ഓണ്‍ലൈനായി ആരംഭിക്കാനും തീരുമാനിച്ചു.
ഓണ്‍ലൈന്‍ രീതിയില്‍ ക്ലാസില്‍ പങ്കെടുക്കുന്ന വിദ്യാര്‍ത്ഥികളുടെ ഹാജര്‍, അദ്ധ്യാപകരുടെ ക്ലാസ് ഷെഡ്യൂളുകള്‍ എന്നിവ പ്രിന്‍സിപ്പല്‍മാര്‍ സൂക്ഷിക്കേണ്ടതും സര്‍വ്വകലാശാലകള്‍ ഇത് പരിശോധിക്കുകയും ചെയ്യും. സിലബസിന്റെ ഓരോ ഭാഗങ്ങളുടെയും വീഡിയോ/ഓഡിയോ അതാത് അധ്യാപകര്‍ കോളേജിന്റെ വെബ്‌സൈറ്റില്‍ അപ്ലോഡ് ചെയ്യണം. സര്‍വകലാശാലകള്‍ കമ്മ്യൂണിറ്റി റേഡിയോ ചാനലുകള്‍ ആരംഭിക്കാനുള്ള സാദ്ധ്യതകള്‍ പരിശോധിക്കും. ചോദ്യപേപ്പര്‍ ഓണ്‍ലൈനില്‍ ലഭ്യമാക്കും. ചോദ്യബാങ്ക് സമ്പ്രദായം നടപ്പിലാക്കും. കോവിഡ് പശ്ചാത്തലത്തില്‍ മറ്റ് സംസ്ഥാനങ്ങളില്‍ ഉപരിപഠനത്തിന് ചേരുന്നതിനുള്ള ബുദ്ധിമുട്ടുകള്‍ കണക്കിലെടുത്ത് ബിരുദ-ബിരുദാനന്തര കോഴ്സുകളില്‍ സീറ്റുകളുടെ എണ്ണം പരമാവധി വര്‍ദ്ധിപ്പിക്കാനാണ് സര്‍ക്കാര്‍ ഉദ്ദേശിക്കുന്നത്. സര്‍വകലാശാലകള്‍ ഇതിനാവശ്യമായ നടപടി കൈക്കൊള്ളണം. ഗവേഷണ വിദ്യാര്‍ഥികളുടെ ഓപ്പണ്‍ ഡിഫെന്‍സ് വീഡിയോ കോണ്‍ഫെറന്‍സിങ് മുഖേന നടത്താനുള്ള നടപടി സ്വീകരിക്കാനും തീരുമാനമായി. കേരള, എം.ജി, കെ.ടി.യു, ന്യൂവാല്‍സ്, സംസ്‌കൃതം, കുസാറ്റ്, മലയാളം, കോഴിക്കോട്, കണ്ണൂര്‍ സര്‍വകലാശാലകളുടെ വൈസ് ചാന്‍സലര്‍മാരും ഉന്നതവിദ്യാഭ്യാസ വകുപ്പ് പ്രിന്‍സിപ്പല്‍ സെക്രട്ടറിയും വീഡിയോ കോണ്‍ഫറന്‍സില്‍ പങ്കെടുത്തു
പരീക്ഷാകേന്ദ്ര മാറ്റം അനുവദിക്കാന്‍ ഉത്തരവായി
എസ്.എസ്.എല്‍.സി/ഹയര്‍ സെക്കന്‍ഡറി/വൊക്കേഷണല്‍ ഹയര്‍ സെക്കന്‍ഡറി പരീക്ഷകള്‍ക്ക് കോവിഡ്19ന്റെ പശ്ചാത്തലത്തില്‍ പരീക്ഷാകേന്ദ്രത്തില്‍ മാറ്റം അനുവദിച്ച് സര്‍ക്കാര്‍ ഉത്തരവായി.
പരീക്ഷാകേന്ദ്രം സ്ഥിതി ചെയ്യുന്ന ജില്ലയിലെ വിദ്യാര്‍ത്ഥികള്‍ മറ്റു ജില്ലകളില്‍ ആയിപ്പോയെങ്കില്‍ സ്വന്തം ജില്ലയില്‍ പരീക്ഷ എഴുതാനും, ഗള്‍ഫ്/ലക്ഷദ്വീപ് മേഖലയില്‍നിന്നും കേരളത്തില്‍ എത്തിയിട്ടുള്ളവര്‍ക്കും, കേരളത്തില്‍ നിന്ന് ഗള്‍ഫ്/ലക്ഷദ്വീപ് മേഖലകളില്‍ എത്തിയ വിദ്യാര്‍ഥികള്‍ക്കും അതത് മേഖലകളില്‍ പരീക്ഷയെഴുതാനും, മോഡല്‍ റസിഡന്‍ഷ്യല്‍ സ്‌കൂളുകള്‍, പ്രീമെട്രിക്/പോസ്റ്റ് മെട്രിക്/സ്പോര്‍ട്സ്/സാമൂഹികനീതി വകുപ്പ് ഹോസ്റ്റലുകളിലെ വിദ്യാര്‍ഥികള്‍ക്ക് ഹോസ്റ്റല്‍ സൗകര്യം ലഭ്യമാകാത്ത സാഹചര്യത്തില്‍ പരീക്ഷാകേന്ദ്രം മാറ്റാനുമാണ് അനുമതി നല്‍കിയത്.
പരീക്ഷാകേന്ദ്ര മാറ്റത്തിന് കൂടുതല്‍ അപേക്ഷകരുണ്ടെങ്കില്‍ ജില്ലകളില്‍ അവര്‍ക്കാര്‍ക്കായി പ്രത്യേക പരീക്ഷാകേന്ദ്രം അനുവദിക്കുന്നതിന്റെ സാധ്യതയും കൂടി പൊതു വിദ്യാഭ്യാസ ഡയറക്ടര്‍ പരിശോധിക്കണമെന്ന് ഉത്തരവില്‍ പറയുന്നു.
പ്രതികരിക്കാൻ ഇവിടെ എഴുതുക: