കാളിയാര്‍: മദ്യപാനവും വഴക്കും ചോദ്യ ചെയ്തതിന് കൊച്ചു മകന്‍ മണ്ണെണ്ണ ഒഴിച്ച് തീ കൊളുത്തി കൊലപ്പെടുത്താന്‍ ശ്രമിച്ച വയോധിക മരിച്ചു. വണ്ണപ്പുറം ചീങ്കല്‍സിറ്റി അറുപരല്‍ ഭാഗത്ത് പുത്തന്‍പുരയ്‌ക്കല്‍ പാപ്പിയമ്മ(90) മരിച്ചു. 14ന് രാത്രി ആണ് കേസിനാസ്പദമായ സംഭവം.
വീട്ടില്‍ വെച്ച് പൊള്ളലേറ്റ് കോട്ടയം മെഡിക്കല്‍ കോളജ് ആശുപത്രിയില്‍ കഴിയവെ ഇന്നലെയാണ് മരിച്ചത്. സംഭവത്തില്‍ പാപിയമ്മയുടെ മകന്റെ മകന്‍ ശ്രീജേഷി(32)നെ കാളിയാര്‍ പൊലീസ് അന്ന് തന്നെ അറസ്റ്റ് ചെയ്തിരുന്നു. റിമാന്‍ഡില്‍ കഴിയുന്ന ശ്രീജേഷിന്റെ പേരില്‍ കൊല കുറ്റത്തിന് കേസ് എടുത്തു. മദ്യപാനം പാപ്പിയമ്മ ചോദ്യം ചെയ്തതിലുള്ള വിരോധമാണ് അക്രമത്തിന് കാരണം.
സംഭവ സമയം വീട്ടില്‍ ശ്രീജേഷിന്റെ അച്ഛന്‍ ശ്രീധരനും പാപ്പിയമ്മയും മാത്രമാണ് ഉണ്ടായിരുന്നത്. വഴക്ക് ഉണ്ടാക്കിയ ശ്രീജേഷ് ആദ്യം ശ്രീധരനെ കല്ലിന് എറിഞ്ഞ് ഓടിച്ചു. ഇത് ചോദ്യം ചെയ്ത പാപ്പിയമ്മയെ തലയില്‍ മണ്ണണ്ണ ഒഴിച്ച് തീ കൊളുത്തുക ആയിരുന്നു എന്ന് പോലീസ് പറഞ്ഞു. പാപ്പിയമ്മയുടെ നിലവിളി കേട്ട് എത്തിയ നാട്ടുകാര്‍ വെള്ളം ഒഴിച്ച് തീ കെടുത്തി. കാളിയാര്‍ പോലീസ് എത്തിയാണ് പാപ്പിയമ്മയെ ആശുപ്രതിയില്‍ എത്തിച്ചത്.
60 ശതമാനത്തിലേറെ പൊള്ളലേറ്റ പാപ്പിയമ്മ അബോധാവസ്ഥയില്‍ ചികിത്സയില്‍ ആയിരുന്നു. മജിസ്ട്രേറ്റ് മെഡിക്കല്‍ കോളജ് ആശുപ്രതിയില്‍ എത്തിയെങ്കിലും മൊഴി എടുക്കാന്‍ കഴിഞ്ഞിരുന്നില്ല. ടൈല്‍ പണിക്കാരനായ ശ്രീജേഷ് അവിവാഹിതനാണ്. പാപ്പിയമ്മയുടെ സംസ്‌കാരം ഇന്ന് രാവിലെ 10ന് വീട്ടു വളപ്പില്‍ നടത്തും. മക്കള്‍: മണി, വാസു, ശ്രീധരന്‍, ഓമന. ശ്രീജേഷിനെ ഭയന്ന് അമ്മ മറ്റൊരു വീട്ടിലാണ് താമസം.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: