രാജാക്കാട്: ചിന്നക്കനാല്‍ കോഴിപ്പനക്കുടിക്ക് സമീപം ഏലതോട്ടത്തില്‍ ജോലി ചെയ്തുകൊണ്ടിരുന്നവര്‍ക്ക് നേരെ കാട്ടാനയുടെ ആക്രമണം, ഒരാള്‍ക്ക് ഗുരുതര പരിക്ക്. തോണ്ടിമല ചൂണ്ടല്‍ സ്വദേശി ഡെന്നീസിനാണ് പരിക്കേറ്റത്. ഇയാളോടൊപ്പമുണ്ടായിരുന്ന ഭാര്യ പാര്‍വതി ഉള്‍പ്പെടെയുള്ളവര്‍ ഓടി രക്ഷപെട്ടു.
ഇന്നലെ രാവിലെ പതിനൊന്നോടെയാണ് സംഭവം. കോഴിപ്പന്നക്കുടിക്ക് സമീപമുള്ള കൃഷിയിടത്തിലെ ജോലികള്‍ക്കായി എത്തിയ ഇവരെ പണികള്‍ ചെയ്തുകൊണ്ടിരിക്കെ ഏലച്ചെടികള്‍ക്കിടയിലൂടെ എത്തിയ ആന ആക്രമിക്കുകയായിരുന്നു. ഇതോടെ എല്ലാവരു തിരിഞ്ഞോടിയെങ്കിലും ഡെന്നീസിനെ ആന തുമ്പിക്കൈകൊണ്ട് അടിച്ച് വീഴിക്കുകയായിരുന്നുവെന്ന് ഒപ്പമുണ്ടായിരുന്നവര്‍ പറഞ്ഞു.
ശബ്ദവും ബഹളവും കേട്ട് സമീപ തോട്ടങ്ങളിലും ഉള്ളവര്‍ ഓടിയെത്തി. ഇവര്‍ ബഹളം വച്ചതോടെ കാട്ടാന പിന്‍ വാങ്ങി. നടുവിനും, തലയ്‌ക്കും പരിക്കേറ്റതിനെ തത്തുടര്‍ന്ന് ഡെന്നീസിനെ രാജകുമാരിയിലെ ദേവമാതാ ആശുപത്രിയില്‍ പ്രവേശിപ്പിച്ചു.
പ്രാഥമിക ശുശ്രൂഷ നല്‍കിയ ശേഷം വിദഗ്ധ ചികിത്സയ്‌ക്കായി കട്ടപ്പനയിലെ ആശുപത്രിയിലേക്ക് മാറ്റി. പ്രദേശത്ത് പലയിടങ്ങളിലായി ആനക്കൂട്ടങ്ങള്‍ തമ്പടിച്ചിരിക്കുന്നതിനാല്‍ നാട്ടുകാര്‍ ഭീതിയിലാണ്.
പ്രതികരിക്കാൻ ഇവിടെ എഴുതുക: