തൊടുപുഴ: ക്വാറന്റൈന്‍ കേന്ദ്രത്തിലെ പോരായ്മകള്‍ പുറത്തുവിട്ടതിന് യുവാവിനെതിരെ കേസെടുത്ത് പോലീസ്. മാലിദ്വീപില്‍ നിന്ന് എത്തിയ യുവാവിനെതിരെ കൊറോണ പരത്തുന്ന നിലയില്‍ പെരുമാറിയതിനും ക്വാറന്റൈന്‍ ലംഘിച്ചതിനുമാണ് കഴിഞ്ഞ ദിവസം തൊടുപുഴ പോലീസ് കേസെടുത്തത്.
അല്‍ അസ്ഹര്‍ കോളേജ് ഹോസ്റ്റലില്‍ ക്വാറന്റൈനില്‍ കഴിയുന്ന കോടികുളം സ്വദേശിയാണ് ഇവിടുത്തെ ചിത്രങ്ങള്‍ സഹിതം വാട്ട്‌സ് ആപ്പ് വഴി മാധ്യമ പ്രവര്‍ത്തകരെ അറിയിച്ചത്. ഇതേ തുടര്‍ന്ന് ഒരു ഓണ്‍ ലൈന്‍ ചാനലില്‍ വാര്‍ത്ത വരികയും ചെയ്തു. പിന്നാലെയാണ് യുവാവിനെതിരെ കേസ് എടുക്കുന്നത്.
ഈ മാസം പത്തിനാണ് മാലിദ്വീപില്‍ നിന്ന് പ്രവാസിയായ യുവാവ് അടക്കമുള്ള സംഘമെത്തിയത്. സംസ്ഥാന സര്‍ക്കാരിന്റെ ജാഗ്രതാ നിര്‍ദ്ദേശങ്ങള്‍ വേണ്ട വിധത്തില്‍ പാലിക്കാതെയാണ് ഈ കേന്ദ്രം പ്രവര്‍ത്തിക്കുന്നതെന്നാണ് സന്ദേശത്തില്‍ പറഞ്ഞിരിക്കുന്നത്. ഇതോടെയാണ് കുമാരമംഗലം പഞ്ചായത്ത് സെക്രട്ടറി പരാതിയുമായി പോലീസിനെ സമീപിച്ചത്.
കുറിപ്പിലെ പ്രധാന വിവരങ്ങള്‍: ക്വാറന്റൈന്‍ കേന്ദ്രത്തിലെ മുറി വളരെ വൃത്തിഹീനമായ ചുറ്റുപാടിലുള്ളതാണ്. എലി തുടങ്ങിയ ജീവികളുടെ വിസര്‍ജ്ജ്യങ്ങള്‍ നിറഞ്ഞ മുറി വേണ്ടരീതിയില്‍ അണുവിമുക്തമാക്കാതെയാണ് ക്വാറന്റൈന്‍ റൂമായി നല്‍കിയത്. എത്തിയ ദിവസം ഏറ്റവും അത്യാവശ്യമായ സോപ്പോ സാനിറ്റൈസറോ പോലും ഇവിടെ ലഭ്യമല്ലായിരുന്നു. എലിപ്പനി പോലെയുള്ള സാംക്രമിക രോഗപകര്‍ച്ചക്കു പോലും സാധ്യതയുള്ളതാണ് ഇവിടുത്തെ സാഹചര്യം. ഈ പ്രശ്‌നങ്ങള്‍ തഹസീല്‍ദാര്‍ മുതലായ ഉദ്യോഗസ്ഥരെ അറിയിച്ചിട്ടും കാര്യക്ഷമമായ ഒരു പരിഹാരം ഉണ്ടായിട്ടില്ല. പരാതിപ്പെടാന്‍ ശ്രമിച്ചതുകൊണ്ട് എന്നെ ഭീഷണിപ്പെടുത്തുകയും ചെയ്യുന്നു. ആവശ്യപ്പെട്ടത് പ്രകാരം സൗകര്യപ്പെടുത്തിയ വൈഫൈയുടെ പാസ്വേഡ് ചോദിച്ചപ്പോള്‍ മൂന്ന് നേരം ഭക്ഷണം മാത്രം നല്‍കാനാണ് നിര്‍ദ്ദേശിച്ചിട്ടുള്ളത് എന്ന് പറഞ്ഞു. എന്നെ സെല്ലിലേക്ക് മാറ്റും എന്ന് വരെ ഭീഷണിപ്പെടുത്തുകയും ചെയ്തു. നിറയെ വ്യാകുലതകളുമായി എത്തിയ ഞങ്ങളെ ഇവിടത്തെ ഉദ്യോഗസ്ഥരുടെ അനാസ്ഥ കൂടുതല്‍ പ്രയാസങ്ങളിലേക്ക് തള്ളിവിടുന്നു എന്നും യുവാവ് അയച്ച കുറിപ്പില്‍ പറയുന്നു.
പ്രതികരിക്കാൻ ഇവിടെ എഴുതുക: