കൊച്ചി: സംസ്ഥാനം കൊറോണ പ്രതിരോധത്തിനായി പ്രയത്‌നിക്കുമ്പോള്‍ നേതാക്കളെ പരസ്പരം ക്വാറന്റൈനിലാക്കാന്‍ സിപിഎമ്മും കോണ്‍ഗ്രസും രാഷ്‌ട്രീയക്കളിയില്‍. വാളയാറില്‍ രോഗം സ്ഥിരീകരിച്ച മലപ്പുറം സ്വദേശിയുടെ സമീപത്തുണ്ടായിരുന്നവര്‍ 14 ദിവസം ക്വാറന്റൈനില്‍ പോവണമെന്ന മെഡിക്കല്‍ ബോര്‍ഡ് തീരുമാനം കോണ്‍ഗ്രസ് നേതാക്കളം ലക്ഷ്യമിട്ടാണെന്നാണ് അവരുടെ ആരോപണം. ഇതിനു പ്രതികാരം എന്ന നിലയില്‍ മന്ത്രി എ.സി. മൊയ്തീനും കെ.വി. അബ്ദുള്‍ഖാദര്‍ എംഎല്‍എയും ക്വാറന്റൈനില്‍ പോകാന്‍ നിര്‍ദേശിക്കണമെന്നാവശ്യപ്പെട്ട് കോണ്‍ഗ്രസ് നേതാവ് അനില്‍ അക്കര എംഎല്‍എ കളക്ടര്‍ക്ക് കത്ത് നല്‍കി.
മലപ്പുറം സ്വദേശി വാളയാര്‍ വഴി വരുമ്പോള്‍ അവിടെയുണ്ടായിരുന്ന എംപിമാരായ ടി.എന്‍. പ്രതാപന്‍, വി.കെ. ശ്രീകണ്ഠന്‍, രമ്യഹരിദാസ്, എംഎല്‍എമാരായ ഷാഫി പറമ്പില്‍, അനില്‍ അക്കര , ബിജെപി സംസ്ഥാന ജന.സെക്രട്ടറി സി. കൃഷ്ണകുമാര്‍, ജില്ലാധ്യക്ഷന്‍ അഡ്വ.ഇ. കൃഷ്ണദാസ്, അമ്പതോളം മാധ്യമപ്രവര്‍ത്തകര്‍, ഡിവൈഎസ്പിമാര്‍ ഉള്‍പ്പെടെയുള്ള പോലീസുകാര്‍, റവന്യൂ ഉദ്യോഗസ്ഥര്‍, തുടങ്ങി നാനൂറോളം പേര്‍ ഹോം ക്വാറന്റൈനില്‍ പ്രവേശിക്കണമെന്നുമാണ് ഇന്നലെ ഡിഎംഒ കെ.പി. റീത്തയുടെ നേതൃത്വത്തിലുള്ള മെഡിക്കല്‍ ബോര്‍ഡ് നിര്‍ദേശിച്ചത്. ഇതിന് തിരിച്ചടിയായാണ് കോണ്‍ഗ്രസ് നേതാവ് കളക്ടര്‍ക്ക് കത്തു നല്‍കിയത്. മൂന്ന് ദിവസം മുന്‍പ് അബുദാബിയില്‍ നിന്നെത്തിയ പ്രവാസി സംഘത്തെ മന്ത്രി മൊയ്തീനും അബ്ദുള്‍ ഖാദറും ചേര്‍ന്ന് ഗുരുവായൂരില്‍ സ്വീകരിച്ചിരുന്നു. പിറ്റേന്ന് ഇതില്‍ രണ്ട് പേര്‍ക്ക് കൊറോണ സ്ഥിരീകരിച്ചു.
നിര്‍ദേശം പാലിക്കും; ബിജെപി നേതാക്കള്‍
പാലക്കാട്. സര്‍ക്കാര്‍ നിര്‍ദ്ദേശം പാലിക്കാന്‍ തയാറാണെന്ന് ബിജെപി സംസ്ഥാന ജനറല്‍ സെക്രട്ടറി സി. കൃഷ്ണകുമാറും ജില്ലാ പ്രസിഡന്റ് ഇ. കൃഷ്ണദാസും അറിയിച്ചു. വാളയാറില്‍ കുടുങ്ങിയ നൂറുകണക്കിന് മലയാളികളുടെ പ്രശ്‌നത്തിന് പരിഹാരം കാണാനാണ് പോയതെന്ന് സി. കൃഷ്ണകുമാര്‍ പറഞ്ഞു. സര്‍ക്കാര്‍ ഈ മഹാമാരിയെ രാഷ്‌ട്രീയ വിരോധം തീര്‍ക്കാനുള്ള വേദിയാക്കില്ലെന്നാണ് കരുതുന്നത് . സിപിഎമ്മും കോണ്‍ഗ്രസ്സും ഇതിനെ രാഷ്‌ട്രീയക്കള്ളിക്കുള്ള വേദിയാക്കുകയാണെന്നും ബിജെപി ആരോപിച്ചു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: