തിരുവനന്തപുരം: വാളയാര് ചെക്ക്പോസ്റ്റ് വഴി കേരളത്തിലെത്തിയ വ്യക്തിക്ക് കോവിഡ് സ്ഥിരീകരിച്ചതില് ആശങ്ക വര്ധിക്കുന്നു. മലപ്പുറം പള്ളിക്കല് ബസാര് സ്വദേശിക്കാണ് കോവിഡ് സ്ഥിരീകരിച്ചത്. വാളയാറില് കഴിഞ്ഞ ദിവസം കോണ്ഗ്രസ് നടത്തിയ സമരത്തില് ഇയാളും പങ്കാളിയായിരുന്നു. ടി.എന്. പ്രതാപന് എംപിയുടെ നേതൃത്വത്തിലായിരുന്നു സമരം. സാമൂഹിക അകലം പോലും പാലിക്കാതെ ആയിരുന്നു സമരം. ഈ സമരത്തിനു ശേഷം പ്രതാപന് തൃശൂര് മെഡിക്കല് കോളേജ് സന്ദര്ശിച്ചിരുന്നു. അവിടെ നഴ്സുമാരുമൊത്ത് കുറേ നേരം പങ്കിട്ടു. നഴ്സുമാര്ക്ക് പ്രതാപന് നേരിട്ട് മധുരം നല്കുകയും ചെയ്തു. ഇതിന്റെ ചിത്രങ്ങളും പുറത്തുവന്നിരുന്നു. ചെന്നൈയില് കൊട്ടിപ്പാക്കത്ത് ജ്യൂസ് കട നടത്തുന്നയാളാണ് രോഗം സ്ഥിരീകരിച്ച നാല്പ്പതുകാരനായ മലപ്പുറം സ്വദേശി. ചെന്നൈയില് വിവിധ തരത്തിലുള്ള കടകള് നടത്തിവന്ന ബാക്കി എട്ടുപേര് വാളയാറില്നിന്ന് മറ്റൊരു വാഹനത്തില് മലപ്പുറത്തേക്ക് പോയി. ഇവരെ വാളയാറില് എത്തിച്ച ഡ്രൈവറുടെ സ്രവവും പരിശോധനയ്ക്ക് അയച്ചിട്ടുണ്ട്.
ഈ മാസം എട്ടിന് ചെന്നൈയില്നിന്ന് യാത്ര തിരിച്ച മലപ്പുറം സ്വദേശി ഒമ്പതിന് രാവിലെ വാളയാര് അതിര്ത്തിയിലെത്തി. ഇയാളടക്കം പത്തംഗസംഘം കേരള പാസില്ലാതെയാണ് വാഹനത്തില് അതിര്ത്തിയില് എത്തിയത്. ഇവരെ ഉള്പ്പെടെ അതിര്ത്തി കടത്തിവിടണമെന്ന് ആവശ്യപ്പെട്ടാണ് കോണ്ഗ്രസ്നേതാക്കള് വാളയാറില് സമരം നടത്തിയത്.
പ്രതാപനെ കൂടാതെ, എംപിമാരായ വി.കെ. ശ്രീകണ്ഠന്, രമ്യ ഹരിദാസ്, എംഎല്എമാരായ ഷാഫി പറമ്പില്, അനില് അക്കര എന്നിവരും സമരത്തിലുണ്ടായിരുന്നു. ഇവരെ നിരീക്ഷണത്തിലാക്കണമെന്ന് ആവശ്യം ഉയര്ന്നിട്ടുണ്ട്. തമിഴ്നാട്നിന്നുള്ള ഗ്രൂപ്പ് പാസ് ഉപയോഗിച്ചാണ് മറ്റ് സംസ്ഥാനങ്ങളില്നിന്ന് സംഘം വാളയാറിലെത്തിയത്. അതിര്ത്തിയില് പൊലീസ് തടഞ്ഞതോടെ ബഹളമായി. ശനിയാഴ്ച വൈകിട്ടോടെ കോണ്ഗ്രസ് സംഘടിപ്പിച്ച പ്രതിഷേധത്തിലും ഇയാള് പങ്കെടുത്തു. രാത്രി വൈകി ഇയാള് ഛര്ദിച്ചു. ഇയാള്ക്കൊപ്പം എത്തിയ സംഘത്തിലെ കോഴിക്കോട് സ്വദേശിക്കും രാത്രിയോടെ രോഗലക്ഷണം കണ്ടു. ഇരുവരേയും ആംബുലന്സില് ഉടന് ജില്ലാ ആശുപത്രിയിലേക്ക് മാറ്റുകയായിരുന്നു. ഇയാള്ക്കൊപ്പം അതിര്ത്തിയിലെത്തിയവരെ പിന്നീട് കോയമ്പത്തൂരിലെ ക്യാമ്പിലേക്ക് മാറ്റി. സര്ക്കാര് നിര്ദേശത്തെ തുടര്ന്ന് പിറ്റേന്ന് പാസ് അനുവദിച്ച് അവരവരുടെ ജില്ലകളിലേക്ക് അയക്കുകയും ചെയ്തു. ജനപ്രതിനിധികളെ കൂടാതെ മാധ്യമപ്രവര്ത്തകര്, സ്ഥലത്തുണ്ടായിരുന്ന പൊലീസ്, മറ്റ് സര്ക്കാര് ഉദ്യോഗസ്ഥര് എന്നിവരെല്ലാം ഇതോടെ ആശങ്കയിലാണ്.
