ന്യൂദല്‍ഹി: ഇന്ത്യയില്‍ ജൂലൈ മാസം അവസാനത്തോടെ കൊറോണ വ്യാപനം രൂക്ഷമാകുമെന്നും ലോക്ഡൗണ്‍ നീക്കുന്നതോടെ കൊവിഡ് കേസുകളുടെ എണ്ണം വര്‍ധിക്കുമെന്നും ലോകാരോഗ്യ സംഘടന(ഡബ്ല്യുഎച്ച്ഒ). വരും മാസങ്ങളില്‍ കേസുകളുടെ എണ്ണത്തില്‍ വര്‍ധനയുണ്ടാകും. എന്നാല്‍ ഇന്ത്യ അസ്വസ്ഥപ്പെടേണ്ടതില്ലെന്നാണ് കരുതുന്നതെന്നും ഡബ്ല്യുഎച്ച്ഒയുടെ പ്രത്യേക കൊവിഡ്19 പ്രതിനിധി ഡോ. ഡേവിഡ് നബാരോ ഒരു ദേശീയ മാധ്യമത്തോടു പറഞ്ഞു.
ലോക്ഡൗണ്‍ നീക്കുന്നതോടെ അവിടവിടെയായി രോഗവ്യാപനമുണ്ടാകും. അതു നിയന്ത്രിക്കാനുമാകും. ജൂലൈ അവസാനത്തോടെ ഇത് ഏറ്റവും ഉയരത്തിലെത്തും. പക്ഷേ, മെച്ചപ്പെടുമെന്നും ഡോ. ഡേവിഡ് നബാരോ പറഞ്ഞു.
ഇന്ത്യയില്‍ രോഗം ഇരട്ടിക്കുന്നതിന്റെ നിരക്ക് 11 ദിവസമാണ്. കൊറോണ വൈറസ് കേസുകളുടെ എണ്ണം കൂടുതലാണെങ്കിലും രാജ്യത്തെ ജനസംഖ്യ കണക്കിലെടുക്കുമ്പോള്‍ അത് വളരെ വലുതല്ല. വയോധിക വിഭാഗത്തിലെ മരണനിരക്ക് പൊതുവെ കൂടുതലാണ്. ഇന്ത്യയ്‌ക്ക് വ്യത്യസ്ത പ്രായപരിധിയുള്ള ജനവിഭാഗം ഉള്ളതിനാല്‍ രാജ്യത്തെ മൊത്തം മരണങ്ങള്‍ താരതമ്യേന കുറവാണെന്നും നബാരോ പറഞ്ഞു
ഇന്ത്യയുടെ ലോക്ഡൗണ്‍ ഉള്‍പ്പടെയുള്ള നടപടി കാരണം നിര്‍ദിഷ്ട മേഖലകളിലേക്ക് പകര്‍ച്ചവ്യാധിയെ പരിമിതപ്പെടുത്താന്‍ കഴിഞ്ഞു. വൈറസ് സാന്നിധ്യം കൂടുതലും മഹാരാഷ്‌ട്ര, ഗുജറാത്ത്, രാജസ്ഥാന്‍, ദല്‍ഹി, തമിഴ്‌നാട് എന്നീ സംസ്ഥാനങ്ങളിലാണ്. വൈറസ് സാന്നിധ്യം ചില നഗരങ്ങളിലുള്ളത് പക്ഷേ ആശങ്കയുളവാക്കുന്നു. ഇന്ത്യ വേഗം പ്രവര്‍ത്തിച്ചതിനാല്‍ സാഹചര്യം നിയന്ത്രണവിധേയമായെന്നും നബാരോ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: