ന്യൂദല്‍ഹി: 5231 റെയില്‍ കോച്ചുകള്‍ കോവിഡ് കെയര്‍ സെന്ററുകളാക്കി മാറ്റി റെയില്‍വേ മന്ത്രാലയം. കേന്ദ്ര ആരോഗ്യ കുടുംബക്ഷേമ മന്ത്രാലയം പുറപ്പെടുവിച്ച മാര്‍ഗനിര്‍ദ്ദേശങ്ങള്‍ അനുസരിച്ച് കോവിഡ് കെയര്‍ സെന്ററുകളില്‍ ചികിത്സിക്കാനാവുന്ന വളരെ ചെറിയ കേസുകള്‍ക്ക് ഈ കോച്ചുകള്‍ ഉപയോഗിക്കാന്‍ കഴിയും. കോവിഡ് സംശയിക്കുന്നതും സ്ഥിരീകരിക്കപ്പെട്ടതുമായ കേസുകളില്‍ അവരെ ഐസൊലേഷനില്‍ പാര്‍പ്പിക്കുവാന്‍ സംസ്ഥാനങ്ങള്‍ക്ക് ഈ കോച്ചുകള്‍ ഉപയോഗിക്കാന്‍ കഴിയും.
കോവിഡ് കെയര്‍ സെന്ററുകള്‍ക്ക് പുറമെ ഇന്ത്യന്‍ റെയില്‍വേ 2500 ല്‍ അധികം ഡോക്ടര്‍മാരെയും 35000 പാരാമെഡിക്കല്‍ ജീവനക്കാരെയും വിന്യസിക്കും. ഡോക്ടര്‍മാരെയും പാരാമെഡിക്കല്‍ ജീവനക്കാരെയും വിവിധ സോണുകള്‍ താല്‍ക്കാലിക അടിസ്ഥാനത്തില്‍ റിക്രൂട്ട് ചെയ്യുന്നുണ്ട്. 17 ആശുപത്രികളിലായി അയ്യായിരത്തോളം കിടക്കകളും റെയില്‍വേ ആശുപത്രികളിലെ 33 ബ്ലോക്കുകളും അടിയന്തിര സാഹചര്യങ്ങളില്‍ ചികിത്സയ്‌ക്കായി സജ്ജമാക്കിയിട്ടുണ്ട്.
കേന്ദ്ര ആരോഗ്യ കുടുംബക്ഷേമ മന്ത്രാലയം പുറപ്പെടുവിച്ച മാര്‍ഗ്ഗനിര്‍ദ്ദേശങ്ങള്‍ അനുസരിച്ച് സംസ്ഥാന സര്‍ക്കാരുകള്‍ റെയില്‍വേക്ക് അഭ്യര്‍ത്ഥനകള്‍ അയക്കുന്നതിനനുസരിച്ച് റെയില്‍വേ ഈ കോച്ചുകള്‍ സംസ്ഥാനങ്ങള്‍ക്കും കേന്ദ്ര ഭരണപ്രദേശങ്ങള്‍ക്കും അനുവദിക്കും. അനുവദിച്ചതിനുശേഷം, ആവശ്യമായ സ്ഥലത്ത് അടിസ്ഥാന സൗകര്യങ്ങളുള്ള സ്റ്റേഷനില്‍, ട്രെയിന്‍ സ്ഥാപിക്കുകയും ജില്ലാ കളക്ടര്‍ക്ക് അല്ലെങ്കില്‍ അവര്‍ അധികാരപ്പെടുത്തിയ വ്യക്തികള്‍ക്ക് കൈമാറുകയും ചെയ്യും. വെള്ളം, വൈദ്യുതി, അറ്റകുറ്റപ്പണികള്‍, ഭക്ഷണ വിതരണം, സുരക്ഷ തുടങ്ങിയ കാര്യങ്ങളുടെ ചുമതല റെയില്‍വേ തന്നെ ഏറ്റെടുക്കും.
പ്രതികരിക്കാൻ ഇവിടെ എഴുതുക: