കണ്ണൂര്: ലോക്ഡൗണില് ജില്ലയിലെ കൗമാരപ്രായക്കാരുടെ സര്ഗാത്മകതയെ പരിപോഷിപ്പിക്കുന്നതിന് ആരോഗ്യ കുടുംബക്ഷേമ വകുപ്പിന്റെയും ദേശീയ ആരോഗ്യ ദൗത്യത്തിന്റെയും സംയുക്താഭിമുഖ്യത്തില് ‘ഉണര്വ്’പരിപാടി ആരംഭിക്കുന്നു. കൗമാരപ്രായക്കാരുടെ ഒഴിവ് സമയം ക്രിയാത്മകമായി ഉപയോഗിച്ച് അവരുടെ സര്ഗാത്മകത പരിപോഷിക്കുന്നതോടൊപ്പം മാനസിക ശാരീരിക ആരോഗ്യം മെച്ചപ്പെടുത്തുന്നതിനായുളള വൈവിധ്യമാര്ന്ന പരിപാടികളാണ് ഉണര്വിന്റെ ഭാഗമായി ആസൂത്രണം ചെയ്തിട്ടുളളത്.
മുഴുവന് സമയവും വീട്ടില് ചിലവഴിക്കേണ്ടിവരുന്നവരില് ഏറ്റവും കൂടുതല് അസ്വസ്ഥത അനുഭവിക്കുന്ന വിഭാഗം 10 വയസ് മുതല് 17 വയസ് വരെയുളളവരാണ്. പരിപാടിയുടെ ഭാഗമായി ദേശീയ ആരോഗ്യ ദൗത്യത്തിന്റെ കീഴില് ഫേസ്ബുക്ക് പേജ് ആരംഭിച്ചിട്ടുണ്ട്. ഈ പേജ് വഴി വിവിധ തരം മത്സരങ്ങളും പരിപാടികളും സംഘടിപ്പിക്കും. യുപി, ഹൈസ്കൂള്, ഹയര് സെക്കന്ററി വിദ്യാര്ത്ഥികള്ക്ക് ഈ പേജില് അംഗങ്ങളായി പരിപാടികള് വീക്ഷിക്കുകയും മത്സരങ്ങളില് പങ്കെടുക്കുകയും ചെയ്യാം.
അടുത്ത ദിവസത്തെ പരിപാടികളുടെയും മല്സരങ്ങളുടെയും വിശദാംശങ്ങള് എല്ലാ ദിവസവും വൈകുന്നേരം 6.15 ന് ഫേസ് ബുക്ക് പേജില് പ്രസിദ്ധീകരിക്കും. എല്ലാ ദിവസവും രാവിലെ 11 മണി മുതല് ഉച്ചയ്ക്ക് 12 മണി വരെ മനശാസ്ത്ര വിദഗധര്, ഡോക്ടര്മാര്, വിദ്യാഭ്യാസ-കരിയര് വിദഗധര്, കലാകായിക മേഖലയിലെ പ്രശസ്തര്, മറ്റ് സെലിബ്രിറ്റികള് എന്നിവരുടെ ക്ലാസുകള്, ടോക്കുകള് എന്നിവയുണ്ടാകും.
ഉച്ചയ്ക്ക് 12 മണി മുതല് മൂന്ന് മണി വരെയാണ് മല്സരങ്ങള് സംഘടിപ്പിക്കുക. മല്സരാര്ത്ഥികള് ഉച്ചയ്ക്ക് മൂന്ന് മണിക്കുളളില് അവരുടെ അന്നേ ദിവസത്തെ സൃഷ്ടിക്കൊപ്പം പൂരിപ്പിച്ച അപേക്ഷാ ഫോറം കൂടി (ഫോറത്തിന്റെ മാതൃക ഫേസ്ബുക്ക് പേജില് ലഭിക്കും) 9072 666 799 എന്ന വാട്സ്ആപ് നമ്പറിലേക്ക് അയക്കണം. മല്സര വിജയികളെ വൈകിട്ട് ആറ് മണിക്ക് പ്രഖ്യാപിക്കും.
ഫേസ് ബുക്ക് പേജ് വഴിയും മാധ്യമങ്ങള് വഴിയും മല്സര വിജയികളുടെ വിശദാംശങ്ങള് അറിയിക്കും. പരിപാടിയുടെ ഉദ്ഘാടനം ഇന്ന് രാവിലെ 10 മണിക്ക് മന്ത്രി കെ.കെ. ശൈലജ നിര്വഹിച്ചു. ജില്ലാ പഞ്ചായത്ത് പ്രസിഡന്റ് കെ.വി. സുമേഷ്, തലശ്ശേരി സബ് കലക്ടര് ആസിഫ് കെ യൂസഫ്, ജില്ലാ മെഡിക്കല് ഓഫീസര് ഡോ. കെ. നാരായണ നായ്ക് എന്നിവര് സംസാരിക്കും.
ജന്മഭൂമി ഓണ്ലൈന്